౩. ఉదుమ్బరఫలదాయకత్థేరఅపదానం

౧౫. ‘‘వినతానదియా తీరే, విహాసి పురిసుత్తమో;

అద్దసం విరజం బుద్ధం, ఏకగ్గం సుసమాహితం.

౧౬. ‘‘తస్మిం పసన్నమానసో, కిలేసమలధోవనే;

ఉదుమ్బరఫలం గయ్హ, బుద్ధసేట్ఠస్సదాసహం.

౧౭. ‘‘ఏకనవుతితో కప్పే, యం ఫలమదదిం తదా;

దుగ్గతిం నాభిజానామి, ఫలదానస్సిదం ఫలం.

౧౮. ‘‘కిలేసా ఝాపితా మయ్హం…పే… విహరామి అనాసవో.

౧౯. ‘‘స్వాగతం వత మే ఆసి…పే… కతం బుద్ధస్స సాసనం.

౨౦. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా ఉదుమ్బరఫలదాయకో థేరో ఇమా గాథాయో అభాసిత్థాతి.

ఉదుమ్బరఫలదాయకత్థేరస్సాపదానం తతియం.