౧. అవటఫలదాయకత్థేరఅపదానం

౧. ‘‘సతరంసి నామ భగవా, సయమ్భూ అపరాజితో;

వివేకకామో సమ్బుద్ధో, గోచరాయాభినిక్ఖమి.

౨. ‘‘ఫలహత్థో అహం దిస్వా, ఉపగచ్ఛిం నరాసభం;

పసన్నచిత్తో సుమనో, అవటం [అవణ్టం (సీ.), అమ్బటం (స్యా.)] అదదిం ఫలం.

౩. ‘‘చతున్నవుతితో కప్పే, యం ఫలమదదిం అహం;

దుగ్గతిం నాభిజానామి, ఫలదానస్సిదం ఫలం.

౪. ‘‘కిలేసా ఝాపితా మయ్హం, భవా సబ్బే సమూహతా;

నాగోవ బన్ధనం ఛేత్వా, విహరామి అనాసవో.

౫. ‘‘స్వాగతం వత మే ఆసి, మమ బుద్ధస్స సన్తికే;

తిస్సో విజ్జా అనుప్పత్తా, కతం బుద్ధస్స సాసనం.

౬. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా అవటఫలదాయకో థేరో ఇమా గాథాయో అభాసిత్థాతి.

అవటఫలదాయకత్థేరస్సాపదానం పఠమం.