౩. తీణుప్పలమాలియత్థేరఅపదానం

౧౩. ‘‘చన్దభాగానదీతీరే, అహోసిం వానరో తదా;

అద్దసం విరజం బుద్ధం, నిసిన్నం పబ్బతన్తరే.

౧౪. ‘‘ఓభాసేన్తం దిసా సబ్బా, సాలరాజంవ ఫుల్లితం;

లక్ఖణబ్యఞ్జనూపేతం, దిస్వానత్తమనో అహం.

౧౫. ‘‘ఉదగ్గచిత్తో సుమనో, పీతియా హట్ఠమానసో;

తీణి ఉప్పలపుప్ఫాని, మత్థకే అభిరోపయిం.

౧౬. ‘‘పూజయిత్వాన పుప్ఫాని, ఫుస్సస్సాహం మహేసినో;

సగారవో భవిత్వాన, పక్కామిం ఉత్తరాముఖో.

౧౭. ‘‘గచ్ఛన్తో పటికుటికో, విప్పసన్నేన చేతసా;

సేలన్తరే పతిత్వాన, పాపుణిం జీవితక్ఖయం.

౧౮. ‘‘తేన కమ్మేన సుకతేన, చేతనాపణిధీహి చ;

జహిత్వా పురిమం జాతిం, తావతింసమగచ్ఛహం.

౧౯. ‘‘సతానం తీణిక్ఖత్తుఞ్చ, దేవరజ్జమకారయిం;

సతానం పఞ్చక్ఖత్తుఞ్చ, చక్కవత్తీ అహోసహం.

౨౦. ‘‘ద్వేనవుతే ఇతో కప్పే, యం పుప్ఫమభిపూజయిం;

దుగ్గతిం నాభిజానామి, బుద్ధపూజాయిదం ఫలం.

౨౧. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా తీణుప్పలమాలియో థేరో ఇమా గాథాయో అభాసిత్థాతి.

తీణుప్పలమాలియత్థేరస్సాపదానం తతియం.