౩౮. బోధివన్దనవగ్గో

౧. బోధివన్దకత్థేరఅపదానం

౧. ‘‘పాటలిం హరితం దిస్వా, పాదపం ధరణీరుహం;

ఏకంసం అఞ్జలిం కత్వా, అవన్దిం పాటలిం అహం.

౨. ‘‘అఞ్జలిం పగ్గహేత్వాన, గరుం కత్వాన మానసం;

అన్తోసుద్ధం బహిసుద్ధం, సువిముత్తమనాసవం.

౩. ‘‘విపస్సిం లోకమహితం, కరుణాఞాణసాగరం;

సమ్ముఖా వియ సమ్బుద్ధం, అవన్దిం పాటలిం అహం.

౪. ‘‘ఏకనవుతితో కప్పే, యం బోధిమభివన్దహం;

దుగ్గతిం నాభిజానామి, వన్దనాయ ఇదం ఫలం.

౫. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా బోధివన్దకో థేరో ఇమా గాథాయో అభాసిత్థాతి.

బోధివన్దకత్థేరస్సాపదానం పఠమం.

౨. పాటలిపుప్ఫియత్థేరఅపదానం

౬. ‘‘విపస్సీ నామ భగవా, సయమ్భూ అగ్గపుగ్గలో;

పురక్ఖతో ససిస్సేహి, పావిసి బన్ధుమం జినో.

౭. ‘‘తీణి పాటలిపుప్ఫాని, ఉచ్ఛఙ్గే ఠపితాని మే;

సీసం న్హాయితుకామోవ, నదీతిత్థం అగచ్ఛహం.

౮. ‘‘నిక్ఖమ్మ బన్ధుమతియా, అద్దసం లోకనాయకం;

ఇన్దీవరంవ జలితం, ఆదిత్తంవ హుతాసనం.

౯. ‘‘బ్యగ్ఘూసభంవ పవరం, అభిజాతంవ కేసరిం;

గచ్ఛన్తం సమణానగ్గం, భిక్ఖుసఙ్ఘపురక్ఖతం.

౧౦. ‘‘తస్మిం పసన్నో [సమణే (క.)] సుగతే, కిలేసమలధోవనే;

గహేత్వా తీణి పుప్ఫాని, బుద్ధసేట్ఠం అపూజయిం.

౧౧. ‘‘ఏకనవుతితో కప్పే, యం పుప్ఫమభిపూజయిం;

దుగ్గతిం నాభిజానామి, బుద్ధపూజాయిదం ఫలం.

౧౨. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా పాటలిపుప్ఫియో థేరో ఇమా గాథాయో అభాసిత్థాతి.

పాటలిపుప్ఫియత్థేరస్సాపదానం దుతియం.

౩. తీణుప్పలమాలియత్థేరఅపదానం

౧౩. ‘‘చన్దభాగానదీతీరే, అహోసిం వానరో తదా;

అద్దసం విరజం బుద్ధం, నిసిన్నం పబ్బతన్తరే.

౧౪. ‘‘ఓభాసేన్తం దిసా సబ్బా, సాలరాజంవ ఫుల్లితం;

లక్ఖణబ్యఞ్జనూపేతం, దిస్వానత్తమనో అహం.

౧౫. ‘‘ఉదగ్గచిత్తో సుమనో, పీతియా హట్ఠమానసో;

తీణి ఉప్పలపుప్ఫాని, మత్థకే అభిరోపయిం.

౧౬. ‘‘పూజయిత్వాన పుప్ఫాని, ఫుస్సస్సాహం మహేసినో;

సగారవో భవిత్వాన, పక్కామిం ఉత్తరాముఖో.

౧౭. ‘‘గచ్ఛన్తో పటికుటికో, విప్పసన్నేన చేతసా;

సేలన్తరే పతిత్వాన, పాపుణిం జీవితక్ఖయం.

౧౮. ‘‘తేన కమ్మేన సుకతేన, చేతనాపణిధీహి చ;

జహిత్వా పురిమం జాతిం, తావతింసమగచ్ఛహం.

౧౯. ‘‘సతానం తీణిక్ఖత్తుఞ్చ, దేవరజ్జమకారయిం;

సతానం పఞ్చక్ఖత్తుఞ్చ, చక్కవత్తీ అహోసహం.

౨౦. ‘‘ద్వేనవుతే ఇతో కప్పే, యం పుప్ఫమభిపూజయిం;

దుగ్గతిం నాభిజానామి, బుద్ధపూజాయిదం ఫలం.

౨౧. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా తీణుప్పలమాలియో థేరో ఇమా గాథాయో అభాసిత్థాతి.

తీణుప్పలమాలియత్థేరస్సాపదానం తతియం.

౪. పట్టిపుప్ఫియత్థేరఅపదానం

౨౨. ‘‘యదా నిబ్బాయి సమ్బుద్ధో, మహేసీ పదుముత్తరో;

సమాగమ్మ జనా సబ్బే, సరీరం నీహరన్తి తే.

౨౩. ‘‘నీహరన్తే సరీరమ్హి, వజ్జమానాసు భేరిసు;

పసన్నచిత్తో సుమనో, పట్టిపుప్ఫం అపూజయిం.

౨౪. ‘‘సతసహస్సితో కప్పే, యం పుప్ఫమభిపూజయిం;

దుగ్గతిం నాభిజానామి, సరీరపూజితే ఫలం.

౨౫. ‘‘కిలేసా ఝాపితా మయ్హం, భవా సబ్బే సమూహతా;

నాగోవ బన్ధనం ఛేత్వా, విహరామి అనాసవో.

౨౬. ‘‘స్వాగతం వత మే ఆసి, మమ బుద్ధస్స [బుద్ధసేట్ఠస్స (సీ.)] సన్తికే;

తిస్సో విజ్జా అనుప్పత్తా, కతం బుద్ధస్స సాసనం.

౨౭. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా పట్టిపుప్ఫియో థేరో ఇమా గాథాయో అభాసిత్థాతి.

పట్టిపుప్ఫియత్థేరస్సాపదానం చతుత్థం.

౫. సత్తపణ్ణియత్థేరఅపదానం

౨౮. ‘‘సుమనో నామ సమ్బుద్ధో, ఉప్పజ్జి లోకనాయకో;

పసన్నచిత్తో సుమనో, సత్తపణ్ణిమపూజయిం.

౨౯. ‘‘సతసహస్సితో కప్పే, సత్తపణ్ణిమపూజయిం;

దుగ్గతిం నాభిజానామి, సత్తపణ్ణిపూజాయిదం [సత్తపణ్ణిస్సిదం (సీ.)] ఫలం.

౩౦. ‘‘కిలేసా ఝాపితా మయ్హం…పే… విహరామి అనాసవో.

౩౧. ‘‘స్వాగతం వత మే ఆసి…పే… కతం బుద్ధస్స సాసనం.

౩౨. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా సత్తపణ్ణియో థేరో ఇమా గాథాయో అభాసిత్థాతి.

సత్తపణ్ణియత్థేరస్సాపదానం పఞ్చమం.

౬. గన్ధముట్ఠియత్థేరఅపదానం

౩౩. [ఇధ గాథాద్ధం ఊనం వియ దిస్సతి] ‘‘చితకే కరీయమానే, నానాగన్ధే సమాహతే;

పసన్నచిత్తో సుమనో, గన్ధముట్ఠిమపూజయిం.

౩౪. ‘‘సతసహస్సితో కప్పే, చితకం యం అపూజయిం;

దుగ్గతిం నాభిజానామి, చితపూజాయిదం ఫలం.

౩౫. ‘‘కిలేసా ఝాపితా మయ్హం…పే… విహరామి అనాసవో.

౩౬. ‘‘స్వాగతం వత మే ఆసి…పే… కతం బుద్ధస్స సాసనం.

౩౭. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా గన్ధముట్ఠియో థేరో ఇమా గాథాయో అభాసిత్థాతి.

గన్ధముట్ఠియత్థేరస్సాపదానం ఛట్ఠం.

౭. చితకపూజకత్థేరఅపదానం

౩౮. ‘‘పరినిబ్బుతే భగవతి, జలజుత్తమనామకే;

ఆరోపితమ్హి చితకే, సాలపుప్ఫమపూజయిం.

౩౯. ‘‘సతసహస్సితో కప్పే, యం పుప్ఫమభిపూజయిం;

దుగ్గతిం నాభిజానామి, చితపూజాయిదం ఫలం.

౪౦. ‘‘కిలేసా ఝాపితా మయ్హం…పే… విహరామి అనాసవో.

౪౧. ‘‘స్వాగతం వత మే ఆసి…పే… కతం బుద్ధస్స సాసనం.

౪౨. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా చితకపూజకో థేరో ఇమా గాథాయో అభాసిత్థాతి.

చితకపూజకత్థేరస్సాపదానం సత్తమం.

౮. సుమనతాలవణ్టియత్థేరఅపదానం

౪౩. ‘‘సిద్ధత్థస్స భగవతో, తాలవణ్టమదాసహం;

సుమనేహి పటిచ్ఛన్నం, ధారయామి మహారహం.

౪౪. ‘‘చతున్నవుతితో కప్పే, తాలవణ్టమదాసహం;

దుగ్గతిం నాభిజానామి, తాలవణ్టస్సిదం ఫలం.

౪౫. ‘‘కిలేసా ఝాపితా మయ్హం…పే… విహరామి అనాసవో.

౪౬. ‘‘స్వాగతం వత మే ఆసి…పే… కతం బుద్ధస్స సాసనం.

౪౭. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా సుమనతాలవణ్టియో థేరో ఇమా గాథాయో అభాసిత్థాతి.

సుమనతాలవణ్టియత్థేరస్సాపదానం అట్ఠమం.

౯. సుమనదామియత్థేరఅపదానం

౪౮. ‘‘సిద్ధత్థస్స భగవతో, న్హాతకస్స తపస్సినో;

కత్వాన సుమనదామం, ధారయిం పురతో ఠితో.

౪౯. ‘‘చతున్నవుతితో కప్పే, యం దామం ధారయిం తదా;

దుగ్గతిం నాభిజానామి, సుమనధారణే ఫలం.

౫౦. ‘‘కిలేసా ఝాపితా మయ్హం…పే… విహరామి అనాసవో.

౫౧. ‘‘స్వాగతం వత మే ఆసి…పే… కతం బుద్ధస్స సాసనం.

౫౨. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా సుమనదామియో థేరో ఇమా గాథాయో అభాసిత్థాతి.

సుమనదామియత్థేరస్సాపదానం నవమం.

౧౦. కాసుమారిఫలదాయకత్థేరఅపదానం

౫౩. ‘‘కణికారంవ జోతన్తం, నిసిన్నం పబ్బతన్తరే;

అద్దసం విరజం బుద్ధం, లోకజేట్ఠం నరాసభం.

౫౪. ‘‘పసన్నచిత్తో సుమనో, సిరే కత్వాన అఞ్జలిం;

కాసుమారిఫలం గయ్హ, బుద్ధసేట్ఠస్సదాసహం.

౫౫. ‘‘ఏకత్తింసే ఇతో కప్పే, యం ఫలమదదిం అహం;

దుగ్గతిం నాభిజానామి, ఫలదానస్సిదం ఫలం.

౫౬. ‘‘కిలేసా ఝాపితా మయ్హం…పే… విహరామి అనాసవో.

౫౭. ‘‘స్వాగతం వత మే ఆసి…పే… కతం బుద్ధస్స సాసనం.

౫౮. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా కాసుమారిఫలదాయకో థేరో ఇమా గాథాయో అభాసిత్థాతి.

కాసుమారిఫలదాయకత్థేరస్సాపదానం దసమం.

బోధివన్దనవగ్గో అట్ఠతింసతిమో.