౮. తిణముట్ఠిదాయకత్థేరఅపదానం

౪౮. ‘‘హిమవన్తస్సావిదూరే, లమ్బకో నామ పబ్బతో;

ఉపతిస్సో నామ సమ్బుద్ధో, అబ్భోకాసమ్హి చఙ్కమి.

౪౯. ‘‘మిగలుద్దో తదా ఆసిం, అరఞ్ఞే కాననే అహం;

దిస్వాన తం దేవదేవం, సయమ్భుం అపరాజితం.

౫౦. ‘‘విప్పసన్నేన చిత్తేన, తదా తస్స మహేసినో;

నిసీదనత్థం బుద్ధస్స, తిణముట్ఠిమదాసహం.

౫౧. ‘‘దత్వాన దేవదేవస్స, భియ్యో చిత్తం పసాదయిం;

సమ్బుద్ధం అభివాదేత్వా, పక్కామిం ఉత్తరాముఖో.

౫౨. ‘‘అచిరం గతమత్తం మం, మిగరాజా అపోథయి [అహేఠయి (సీ. స్యా.)];

సీహేన పోథితో [పాతితో (సీ. స్యా.)] సన్తో, తత్థ కాలఙ్కతో అహం.

౫౩. ‘‘ఆసన్నే మే కతం కమ్మం, బుద్ధసేట్ఠే అనాసవే;

సుముత్తో సరవేగోవ, దేవలోకం అగఞ్ఛహం.

౫౪. ‘‘యూపో తత్థ సుభో ఆసి, పుఞ్ఞకమ్మాభినిమ్మితో;

సహస్సకణ్డో సతభేణ్డు, ధజాలు హరితామయో.

౫౫. ‘‘పభా నిద్ధావతే తస్స, సతరంసీవ ఉగ్గతో;

ఆకిణ్ణో దేవకఞ్ఞాహి, ఆమోదిం కామకామహం.

౫౬. ‘‘దేవలోకా చవిత్వాన, సుక్కమూలేన చోదితో;

ఆగన్త్వాన మనుస్సత్తం, పత్తోమ్హి ఆసవక్ఖయం.

౫౭. ‘‘చతున్నవుతితో కప్పే, నిసీదనమదాసహం;

దుగ్గతిం నాభిజానామి, తిణముట్ఠియిదం ఫలం.

౫౮. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా తిణముట్ఠిదాయకో థేరో ఇమా గాథాయో అభాసిత్థాతి.

తిణముట్ఠిదాయకత్థేరస్సాపదానం అట్ఠమం.