౩౫. ఏకపదుమియవగ్గో

౧. ఏకపదుమియత్థేరఅపదానం

౧. ‘‘పదుముత్తరో నామ జినో, సబ్బధమ్మాన పారగూ;

భవాభవే విభావేన్తో, తారేసి జనతం బహుం.

౨. ‘‘హంసరాజా తదా హోమి, దిజానం పవరో అహం;

జాతస్సరం సమోగయ్హ, కీళామి హంసకీళితం.

౩. ‘‘పదుముత్తరో లోకవిదూ, ఆహుతీనం పటిగ్గహో;

జాతస్సరస్స ఉపరి, ఆగచ్ఛి తావదే జినో.

౪. ‘‘దిస్వానహం దేవదేవం, సయమ్భుం లోకనాయకం;

వణ్టే ఛేత్వాన పదుమం, సతపత్తం మనోరమం.

౫. ‘‘ముఖతుణ్డేన పగ్గయ్హ, పసన్నో లోకనాయకే [విప్పసన్నేన చేతసా (స్యా.)];

ఉక్ఖిపిత్వాన గగణే [ఉక్ఖిపిత్వా నలాటేన (క.)], బుద్ధసేట్ఠం అపూజయిం.

౬. ‘‘పదుముత్తరో లోకవిదూ, ఆహుతీనం పటిగ్గహో;

అన్తలిక్ఖే ఠితో సత్థా, అకా మే అనుమోదనం.

౭. ‘‘‘ఇమినా ఏకపదుమేన, చేతనాపణిధీహి చ;

కప్పానం సతసహస్సం, వినిపాతం న గచ్ఛసి’.

౮. ‘‘ఇదం వత్వాన సమ్బుద్ధో, జలజుత్తమనామకో;

మమ కమ్మం పకిత్తేత్వా, అగమా యేన పత్థితం.

౯. ‘‘సతసహస్సితో కప్పే, యం కమ్మమకరిం తదా;

దుగ్గతిం నాభిజానామి, బుద్ధపూజాయిదం ఫలం.

౧౦. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా ఏకపదుమియో థేరో ఇమా గాథాయో అభాసిత్థాతి.

ఏకపదుమియత్థేరస్సాపదానం పఠమం.

౨. తీణుప్పలమాలియత్థేరఅపదానం

౧౧. ‘‘చన్దభాగానదీతీరే, అహోసిం వానరో తదా;

అద్దసం విరజం బుద్ధం, నిసిన్నం పబ్బతన్తరే.

౧౨. ‘‘ఓభాసేన్తం దిసా సబ్బా, సాలరాజంవ ఫుల్లితం;

లక్ఖణబ్యఞ్జనూపేతం, దిస్వా అత్తమనో అహుం.

౧౩. ‘‘ఉదగ్గచిత్తో సుమనో, పీతియా హట్ఠమానసో;

తీణి ఉప్పలపుప్ఫాని, మత్థకే అభిరోపయిం.

౧౪. ‘‘పుప్ఫాని అభిరోపేత్వా, విపస్సిస్స మహేసినో;

సగారవో భవిత్వాన [గమిత్వాన (సీ.), నమిత్వాన (క.)], పక్కామిం ఉత్తరాముఖో.

౧౫. ‘‘గచ్ఛన్తో పటికుటికో, విప్పసన్నేన చేతసా;

సేలన్తరే పతిత్వాన [పపతిత్వా (స్యా. క.)], పాపుణిం జీవితక్ఖయం.

౧౬. ‘‘తేన కమ్మేన సుకతేన, చేతనాపణిధీహి చ;

జహిత్వా మానుసం దేహం [పురిమం జాతిం (?) ఉపరి ౩౮ వగ్గే తతియాపదానే ఏవమేవ దిస్సతి], తావతింసమగచ్ఛహం.

౧౭. ‘‘సతానం తీణిక్ఖత్తుఞ్చ, దేవరజ్జం అకారయిం;

సతానం పఞ్చక్ఖత్తుఞ్చ, చక్కవత్తీ అహోసహం.

౧౮. ‘‘ఏకనవుతితో కప్పే, యం పుప్ఫమభిపూజయిం;

దుగ్గతిం నాభిజానామి, బుద్ధపూజాయిదం ఫలం.

౧౯. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా తీణుప్పలమాలియో [తిఉప్పలమాలియో (సీ.)] థేరో ఇమా గాథాయో అభాసిత్థాతి.

తీణుప్పలమాలియత్థేరస్సాపదానం దుతియం.

౩. ధజదాయకత్థేరఅపదానం

౨౦. ‘‘తిస్సో నామ అహు సత్థా, లోకజేట్ఠో నరాసభో;

తయోపధిక్ఖయే [తస్సోపధిక్ఖయే (సీ.)] దిస్వా, ధజం ఆరోపితం మయా.

౨౧. ‘‘తేన కమ్మేన సుకతేన, చేతనాపణిధీహి చ;

జహిత్వా మానుసం దేహం, తావతింసమగచ్ఛహం.

౨౨. ‘‘సతానం తీణిక్ఖత్తుఞ్చ, దేవరజ్జం అకారయిం;

సతానం పఞ్చక్ఖత్తుఞ్చ, చక్కవత్తీ అహోసహం.

౨౩. ‘‘పదేసరజ్జం విపులం, గణనాతో అసఙ్ఖియం;

అనుభోమి సకం కమ్మం, పుబ్బే సుకతమత్తనో.

౨౪. ‘‘ద్వేనవుతే ఇతో కప్పే, యం కమ్మమకరిం తదా;

దుగ్గతిం నాభిజానామి, ధజదానస్సిదం ఫలం.

౨౫. ‘‘ఇచ్ఛమానో చహం అజ్జ, సకాననం సపబ్బతం;

ఖోమదుస్సేన ఛాదేయ్యం, తదా మయ్హం కతే ఫలం.

౨౬. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా ధజదాయకో థేరో ఇమా గాథాయో అభాసిత్థాతి.

ధజదాయకత్థేరస్సాపదానం తతియం.

౪. తికిఙ్కణిపూజకత్థేరఅపదానం

౨౭. ‘‘హిమవన్తస్సావిదూరే, భూతగణో నామ పబ్బతో;

తత్థద్దసం పంసుకూలం, దుమగ్గమ్హి విలగ్గితం.

౨౮. ‘‘తీణి కిఙ్కణిపుప్ఫాని, ఓచినిత్వానహం తదా;

హట్ఠో హట్ఠేన చిత్తేన, పంసుకూలం అపూజయిం.

౨౯. ‘‘ఏకత్తింసే ఇతో కప్పే, యం కమ్మమకరిం తదా;

దుగ్గతిం నాభిజానామి, తిణ్ణం పుప్ఫానిదం ఫలం.

౩౦. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా తికిఙ్కణిపూజకో థేరో ఇమా గాథాయో అభాసిత్థాతి.

తికిఙ్కణిపూజకత్థేరస్సాపదానం చతుత్థం.

౫. నళాగారికత్థేరఅపదానం

౩౧. ‘‘హిమవన్తస్సావిదూరే, హారితో నామ పబ్బతో;

సయమ్భూ నారదో నామ, రుక్ఖమూలే వసీ తదా.

౩౨. ‘‘నళాగారం కరిత్వాన, తిణేన ఛాదయిం అహం;

చఙ్కమం సోధయిత్వాన, సయమ్భుస్స అదాసహం.

౩౩. ‘‘చతుద్దససు కప్పేసు, దేవలోకే రమిం అహం;

చతుసత్తతిక్ఖత్తుఞ్చ, దేవరజ్జం అకారయిం.

౩౪. ‘‘చతుసత్తతి [సత్తసత్తతి (సీ.)] క్ఖత్తుఞ్చ, చక్కవత్తీ అహోసహం;

పదేసరజ్జం విపులం, గణనాతో అసఙ్ఖియం.

౩౫. ‘‘ఉబ్బిద్ధం భవనం మయ్హం, ఇన్దలట్ఠీవ ఉగ్గతం;

సహస్సథమ్భం అతులం, విమానం సపభస్సరం.

౩౬. ‘‘ద్వే సమ్పత్తీ అనుభోత్వా, సుక్కమూలేన చోదితో;

గోతమస్స భగవతో, సాసనే పబ్బజిం అహం.

౩౭. ‘‘పధానపహితత్తోమ్హి, ఉపసన్తో నిరూపధి;

నాగోవ బన్ధనం ఛేత్వా, విహరామి అనాసవో.

౩౮. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా నళాగారికో థేరో ఇమా గాథాయో అభాసిత్థాతి.

నళాగారికత్థేరస్సాపదానం పఞ్చమం.

౬. చమ్పకపుప్ఫియత్థేరఅపదానం

౩౯. ‘‘హిమవన్తస్సావిదూరే, జాపలో [చాపలో (సీ.), ఛాపలో (స్యా.)] నామ పబ్బతో;

బుద్ధో సుదస్సనో నామ, విహాసి పబ్బతన్తరే.

౪౦. ‘‘పుప్ఫం హేమవన్తం [హేమవతం (సీ.), హేమవణ్ణం (స్యా.)] గయ్హ, గచ్ఛం వేహాయసేనహం;

అద్దసం విరజం బుద్ధం, ఓఘతిణ్ణమనాసవం.

౪౧. ‘‘సత్త చమ్పకపుప్ఫాని, సీసే కత్వానహం తదా;

బుద్ధస్స అభిరోపేసిం, సయమ్భుస్స మహేసినో.

౪౨. ‘‘ఏకత్తింసే ఇతో కప్పే, యం పుప్ఫమభిరోపయిం;

దుగ్గతిం నాభిజానామి, బుద్ధపూజాయిదం ఫలం.

౪౩. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా చమ్పకపుప్ఫియో థేరో ఇమా గాథాయో అభాసిత్థాతి.

చమ్పకపుప్ఫియత్థేరస్సాపదానం ఛట్ఠం.

౭. పదుమపూజకత్థేరఅపదానం

౪౪. ‘‘హిమవన్తస్సావిదూరే, రోమసో నామ పబ్బతో;

బుద్ధోపి సమ్భవో నామ, అబ్భోకాసే వసీ తదా.

౪౫. ‘‘భవనా నిక్ఖమిత్వాన, పదుమం ధారయిం అహం;

ఏకాహం ధారయిత్వాన, పున భవనుపాగమిం.

౪౬. ‘‘ఏకనవుతితో కప్పే, యం పుప్ఫమభిరోపయిం;

దుగ్గతిం నాభిజానామి, బుద్ధపూజాయిదం ఫలం.

౪౭. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా పదుమపూజకో థేరో ఇమా గాథాయో అభాసిత్థాతి.

పదుమపూజకత్థేరస్సాపదానం సత్తమం.

తేరసమం భాణవారం.

౮. తిణముట్ఠిదాయకత్థేరఅపదానం

౪౮. ‘‘హిమవన్తస్సావిదూరే, లమ్బకో నామ పబ్బతో;

ఉపతిస్సో నామ సమ్బుద్ధో, అబ్భోకాసమ్హి చఙ్కమి.

౪౯. ‘‘మిగలుద్దో తదా ఆసిం, అరఞ్ఞే కాననే అహం;

దిస్వాన తం దేవదేవం, సయమ్భుం అపరాజితం.

౫౦. ‘‘విప్పసన్నేన చిత్తేన, తదా తస్స మహేసినో;

నిసీదనత్థం బుద్ధస్స, తిణముట్ఠిమదాసహం.

౫౧. ‘‘దత్వాన దేవదేవస్స, భియ్యో చిత్తం పసాదయిం;

సమ్బుద్ధం అభివాదేత్వా, పక్కామిం ఉత్తరాముఖో.

౫౨. ‘‘అచిరం గతమత్తం మం, మిగరాజా అపోథయి [అహేఠయి (సీ. స్యా.)];

సీహేన పోథితో [పాతితో (సీ. స్యా.)] సన్తో, తత్థ కాలఙ్కతో అహం.

౫౩. ‘‘ఆసన్నే మే కతం కమ్మం, బుద్ధసేట్ఠే అనాసవే;

సుముత్తో సరవేగోవ, దేవలోకం అగఞ్ఛహం.

౫౪. ‘‘యూపో తత్థ సుభో ఆసి, పుఞ్ఞకమ్మాభినిమ్మితో;

సహస్సకణ్డో సతభేణ్డు, ధజాలు హరితామయో.

౫౫. ‘‘పభా నిద్ధావతే తస్స, సతరంసీవ ఉగ్గతో;

ఆకిణ్ణో దేవకఞ్ఞాహి, ఆమోదిం కామకామహం.

౫౬. ‘‘దేవలోకా చవిత్వాన, సుక్కమూలేన చోదితో;

ఆగన్త్వాన మనుస్సత్తం, పత్తోమ్హి ఆసవక్ఖయం.

౫౭. ‘‘చతున్నవుతితో కప్పే, నిసీదనమదాసహం;

దుగ్గతిం నాభిజానామి, తిణముట్ఠియిదం ఫలం.

౫౮. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా తిణముట్ఠిదాయకో థేరో ఇమా గాథాయో అభాసిత్థాతి.

తిణముట్ఠిదాయకత్థేరస్సాపదానం అట్ఠమం.

౯. తిన్దుకఫలదాయకత్థేరఅపదానం

౫౯. ‘‘కణికారంవ జోతన్తం, నిసిన్నం పబ్బతన్తరే;

అద్దసం విరజం బుద్ధం, ఓఘతిణ్ణమనాసవం.

౬౦. ‘‘తిన్దుకం సఫలం దిస్వా, భిన్దిత్వాన సకోసకం [సకోటకం (సీ.), సకోటికం (స్యా.)];

పసన్నచిత్తో సుమనో, సయమ్భుస్స మదాసహం [వేస్సభుస్స అదాసహం (సీ.)].

౬౧. ‘‘ఏకనవుతితో కప్పే, యం ఫలమదదిం తదా;

దుగ్గతిం నాభిజానామి, ఫలదానస్సిదం ఫలం.

౬౨. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా తిన్దుకఫలదాయకో థేరో ఇమా గాథాయో అభాసిత్థాతి.

తిన్దుకఫలదాయకత్థేరస్సాపదానం నవమం.

౧౦. ఏకఞ్జలియత్థేరఅపదానం

౬౩. ‘‘రోమసో [రేవతో (సీ.)] నామ సమ్బుద్ధో, నదీకూలే వసీ తదా;

అద్దసం విరజం బుద్ధం, పీతరంసింవ భాణుమం.

౬౪. ‘‘ఉక్కాముఖపహట్ఠంవ, ఖదిరఙ్గారసన్నిభం;

ఓసధింవ విరోచన్తం, ఏకఞ్జలిమకాసహం.