౧. గన్ధధూపియత్థేరఅపదానం

౧. ‘‘సిద్ధత్థస్స భగవతో, గన్ధధూపం అదాసహం;

సుమనేహి పటిచ్ఛన్నం, బుద్ధానుచ్ఛవికఞ్చ తం.

౨. ‘‘కఞ్చనగ్ఘియసఙ్కాసం, బుద్ధం లోకగ్గనాయకం;

ఇన్దీవరంవ జలితం, ఆదిత్తంవ హుతాసనం.

౩. ‘‘బ్యగ్ఘుసభంవ పవరం, అభిజాతంవ కేసరిం;

నిసిన్నం సమణానగ్గం, భిక్ఖుసఙ్ఘపురక్ఖతం.

౪. ‘‘దిస్వా చిత్తం పసాదేత్వా, పగ్గహేత్వాన అఞ్జలిం;

వన్దిత్వా సత్థునో పాదే, పక్కామిం ఉత్తరాముఖో.

౫. ‘‘చతున్నవుతితో కప్పే, యం గన్ధమదదిం తదా;

దుగ్గతిం నాభిజానామి, గన్ధపూజాయిదం ఫలం.

౬. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా గన్ధధూపియో థేరో ఇమా గాథాయో అభాసిత్థాతి.

గన్ధధూపియత్థేరస్సాపదానం పఠమం.