౪. యఞ్ఞసామికత్థేరఅపదానం

౧౭. ‘‘జాతియా సత్తవస్సోహం, అహోసిం మన్తపారగూ;

కులవత్తం [కులవంసం (సీ. స్యా.)] అధారేసిం, యఞ్ఞో ఉస్సాహితో మయా.

౧౮. ‘‘చుల్లాసీతిసహస్సాని, పసూ హఞ్ఞన్తి మే తదా;

సారథమ్భుపనీతాని [తారస్మీహి ఉపనీతాని (క.), సారస్మింహి ఉపనీతాని (స్యా.)], యఞ్ఞత్థాయ ఉపట్ఠితా.

౧౯. ‘‘ఉక్కాముఖపహట్ఠోవ, ఖదిరఙ్గారసన్నిభో;

ఉదయన్తోవ సూరియో, పుణ్ణమాయేవ [పుణ్ణమాసేవ (సీ.)] చన్దిమా.

౨౦. ‘‘సిద్ధత్థో సబ్బసిద్ధత్థో, తిలోకమహితో హితో;

ఉపగన్త్వాన సమ్బుద్ధో, ఇదం వచనమబ్రవి.

౨౧. ‘‘‘అహింసా సబ్బపాణీనం, కుమార మమ రుచ్చతి;

థేయ్యా చ అతిచారా చ, మజ్జపానా చ ఆరతి.

౨౨. ‘‘‘రతి చ సమచరియాయ, బాహుసచ్చం కతఞ్ఞుతా;

దిట్ఠే ధమ్మే పరత్థ చ, ధమ్మా ఏతే పసంసియా.

౨౩. ‘‘‘ఏతే ధమ్మే భావయిత్వా, సబ్బసత్తహితే రతో [హితేసితో (క.)];

బుద్ధే చిత్తం పసాదేత్వా, భావేహి మగ్గముత్తమం’.

౨౪. ‘‘ఇదం వత్వాన సబ్బఞ్ఞూ, లోకజేట్ఠో నరాసభో;

మమేవం అనుసాసిత్వా, వేహాసం ఉగ్గతో గతో.

౨౫. ‘‘పుబ్బే చిత్తం విసోధేత్వా, పచ్ఛా చిత్తం పసాదయిం;

తేన చిత్తప్పసాదేన, తుసితం ఉపపజ్జహం.

౨౬. ‘‘చతున్నవుతితో కప్పే, యదా చిత్తం పసాదయిం;

దుగ్గతిం నాభిజానామి, బుద్ధసఞ్ఞాయిదం ఫలం.

౨౭. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా యఞ్ఞసామికో థేరో ఇమా గాథాయో అభాసిత్థాతి.

యఞ్ఞసామికత్థేరస్సాపదానం చతుత్థం.