౬. ఆసనసన్థవికత్థేరఅపదానం

౨౬. ‘‘చేతియం ఉత్తమం నామ, సిఖినో లోకబన్ధునో;

అరఞ్ఞే ఇరీణే వనే, అన్ధాహిణ్డామహం తదా.

౨౭. ‘‘పవనా నిక్ఖమన్తేన, దిట్ఠం సీహాసనం మయా;

ఏకంసం అఞ్జలిం కత్వా, సన్థవిం [థవిస్సం (సీ.)] లోకనాయకం.

౨౮. ‘‘దివసభాగం థవిత్వాన, బుద్ధం లోకగ్గనాయకం;

హట్ఠో హట్ఠేన చిత్తేన, ఇమం వాచం ఉదీరయిం.

౨౯. ‘‘‘నమో తే పురిసాజఞ్ఞ, నమో తే పురిసుత్తమ;

సబ్బఞ్ఞూసి మహావీర, లోకజేట్ఠ నరాసభ’.

౩౦. ‘‘అభిత్థవిత్వా సిఖినం, నిమిత్తకరణేనహం;

ఆసనం అభివాదేత్వా, పక్కామిం ఉత్తరాముఖో.

౩౧. ‘‘ఏకత్తింసే ఇతో కప్పే, యం థవిం వదతం వరం;

దుగ్గతిం నాభిజానామి, థోమనాయ ఇదం ఫలం.

౩౨. ‘‘సత్తవీసే ఇతో కప్పే, అతులా సత్త ఆసు తే;

సత్తరతనసమ్పన్నా, చక్కవత్తీ మహబ్బలా.

౩౩. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా ఆసనసన్థవికో [ఆసనసన్థవకో (?), ఆసనథవికో (క.), ఆసనత్థవికో (సీ. స్యా.)] థేరో ఇమా గాథాయో అభాసిత్థాతి.

ఆసనసన్థవికత్థేరస్సాపదానం ఛట్ఠం.