౭. ఆరామదాయకత్థేరఅపదానం

౩౨. ‘‘సిద్ధత్థస్స భగవతో, ఆరామో రోపితో మయా;

సన్దచ్ఛాయేసు [సీతఛాయేసు (స్యా.), సన్తచ్ఛాయేసు (క.)] రుక్ఖేసు, ఉపాసన్తేసు పక్ఖిసు.

౩౩. ‘‘అద్దసం విరజం బుద్ధం, ఆహుతీనం పటిగ్గహం;

ఆరామం అభినామేసిం, లోకజేట్ఠం నరాసభం.

౩౪. ‘‘హట్ఠో హట్ఠేన చిత్తేన, ఫలం పుప్ఫమదాసహం;

తతో జాతప్పసాదోవ, తం వనం పరిణామయిం.

౩౫. ‘‘బుద్ధస్స యమిదం దాసిం, విప్పసన్నేన చేతసా;

భవే నిబ్బత్తమానమ్హి, నిబ్బత్తతి ఫలం మమ.

౩౬. ‘‘చతున్నవుతితో కప్పే, యం ఆరామమదం తదా;

దుగ్గతిం నాభిజానామి, ఆరామస్స ఇదం ఫలం.

౩౭. ‘‘సత్తతింసే ఇతో కప్పే, సత్తాసుం ముదుసీతలా;

సత్తరతనసమ్పన్నా, చక్కవత్తీ మహబ్బలా.

౩౮. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా ఆరామదాయకో థేరో ఇమా గాథాయో అభాసిత్థాతి.

ఆరామదాయకత్థేరస్సాపదానం సత్తమం.