౩. తిసరణగమనియత్థేరఅపదానం

౧౦౬. ‘‘నగరే చన్దవతియా [బన్ధుమతియా (అట్ఠ.)], మాతుఉపట్ఠాకో [మాతుపట్ఠాయకో (సీ.), మాతుపట్ఠానకో (స్యా.)] అహుం;

అన్ధా మాతా పితా మయ్హం, తే పోసేమి అహం తదా.

౧౦౭. ‘‘రహోగతో నిసీదిత్వా, ఏవం చిన్తేసహం తదా;

పోసేన్తో మాతాపితరో, పబ్బజ్జం న లభామహం.

౧౦౮. ‘‘మహన్ధకారపిహితా [తమన్ధకారపిహితా (స్యా.)], తివిధగ్గీహి డయ్హరే;

ఏతాదిసే భవే [భయే (సీ.)] జాతే, నత్థి కోచి వినాయకో.

౧౦౯. ‘‘బుద్ధో లోకే సముప్పన్నో, దిప్పతి [దిబ్బతి (క.)] [జినసాసనం (సీ.)] దాని సాసనం;

సక్కా ఉద్ధరితుం అత్తా, పుఞ్ఞకామేన జన్తునా.

౧౧౦. ‘‘ఉగ్గయ్హ తీణి సరణే, పరిపుణ్ణాని గోపయిం;

తేన కమ్మేన సుకతేన, పటిమోక్ఖామి దుగ్గతిం.

౧౧౧. ‘‘నిసభో నామ సమణో, బుద్ధస్స అగ్గసావకో;

తమహం ఉపగన్త్వాన, సరణగమనం గహిం.

౧౧౨. ‘‘వస్ససతసహస్సాని, ఆయు విజ్జతి తావదే;

తావతా సరణగమనం, పరిపుణ్ణం అగోపయిం.

౧౧౩. ‘‘చరిమే వత్తమానమ్హి, సరణం తం అనుస్సరిం;

తేన కమ్మేన సుకతేన, తావతింసం అగచ్ఛహం.

౧౧౪. ‘‘దేవలోకగతో సన్తో, పుఞ్ఞకమ్మసమాహితో;

యం దేసం [యం యం దేసం (స్యా.)] ఉపపజ్జామి [ఉపగచ్ఛామి (సీ.)], అట్ఠ హేతూ లభామహం.

౧౧౫. ‘‘దిసాసు పూజితో హోమి, తిక్ఖపఞ్ఞో భవామహం;

సబ్బే దేవానువత్తన్తి, అమితభోగం లభామహం.

౧౧౬. ‘‘సువణ్ణవణ్ణో సబ్బత్థ, పటికన్తో భవామహం;

మిత్తానం అచలో హోమి, యసో అబ్భుగ్గతో మమం.

౧౧౭. ‘‘అసీతిక్ఖత్తు దేవిన్దో, దేవరజ్జమకారయిం;

దిబ్బసుఖం అనుభవిం, అచ్ఛరాహి పురక్ఖతో.

౧౧౮. ‘‘పఞ్చసత్తతిక్ఖత్తుఞ్చ, చక్కవత్తీ అహోసహం;

పదేసరజ్జం విపులం, గణనాతో అసఙ్ఖియం.

౧౧౯. ‘‘పచ్ఛిమే భవే సమ్పత్తే, పుఞ్ఞకమ్మసమాహితో;

పురే సావత్థియం జాతో, మహాసాలే సుఅడ్ఢకే.

౧౨౦. ‘‘నగరా నిక్ఖమిత్వాన, దారకేహి పురక్ఖతో;

హసఖిడ్డసమఙ్గీహం [సాహం ఖిడ్డసమఙ్గీ (స్యా.)], సఙ్ఘారామం ఉపాగమిం.

౧౨౧. ‘‘తత్థద్దసాసిం [తత్థద్దసాహం (క.)] సమణం, విప్పముత్తం నిరూపధిం;

సో మే ధమ్మమదేసేసి, సరణఞ్చ అదాసి మే.

౧౨౨. ‘‘సోహం సుత్వాన సరణం, సరణం మే అనుస్సరిం;

ఏకాసనే నిసీదిత్వా, అరహత్తమపాపుణిం.

౧౨౩. ‘‘జాతియా సత్తమే వస్సే, అరహత్తమపాపుణిం;

ఉపసమ్పాదయి బుద్ధో, గుణమఞ్ఞాయ చక్ఖుమా.

౧౨౪. ‘‘అపరిమేయ్యే ఇతో కప్పే, సరణాని అగచ్ఛహం;

తతో మే సుకతం కమ్మం, ఫలం దస్సేసి మే ఇధ.

౧౨౫. ‘‘సుగోపితం మే సరణం, మానసం సుప్పణీహితం;

అనుభోత్వా యసం సబ్బం, పత్తోమ్హి అచలం పదం.

౧౨౬. ‘‘యేసం సోతావధానత్థి, సుణోథ మమ భాసతో;

అహం [అత్థం (స్యా.)] వో కథయిస్సామి, సామం దిట్ఠం పదం మమ.

౧౨౭. ‘‘‘బుద్ధో లోకే సముప్పన్నో, వత్తతే జినసాసనం;

అమతా వాదితా భేరీ, సోకసల్లవినోదనా.

౧౨౮. ‘‘‘యథాసకేన థామేన, పుఞ్ఞక్ఖేత్తే అనుత్తరే;

అధికారం కరేయ్యాథ, పస్సయిస్సథ నిబ్బుతిం.

౧౨౯. ‘‘‘పగ్గయ్హ తీణి సరణే, పఞ్చసీలాని గోపియ;

బుద్ధే చిత్తం పసాదేత్వా, దుక్ఖస్సన్తం కరిస్సథ.

౧౩౦. ‘‘‘సమ్మా ధమ్మం భావేత్వాన [మమోపమం కరిత్వాన (సీ. స్యా.)], సీలాని పరిగోపియ;

అచిరం అరహత్తం వో, సబ్బేపి పాపుణిస్సథ.

౧౩౧. ‘‘‘తేవిజ్జో ఇద్ధిపత్తోమ్హి, చేతోపరియకోవిదో;

సావకో తే మహావీర, సరణో [చరణే (సీ. స్యా.)] వన్దతి సత్థునో’.

౧౩౨. ‘‘అపరిమేయ్యే ఇతో కప్పే, సరణం బుద్ధస్స గచ్ఛహం;

దుగ్గతిం నాభిజానామి, సరణం గమనే ఫలం.

౧౩౩. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా తిసరణగమనియో థేరో ఇమా గాథాయో అభాసిత్థాతి.

తిసరణగమనియత్థేరస్సాపదానం తతియం.