౪. పఞ్చసీలసమాదానియత్థేరఅపదానం

౧౩౪. ‘‘నగరే చన్దవతియా, భతకో ఆసహం తదా;

పరకమ్మాయనే యుత్తో, పబ్బజ్జం న లభామహం.

౧౩౫. ‘‘మహన్ధకారపిహితా, తివిధగ్గీహి డయ్హరే;

కేన ను ఖో ఉపాయేన, విసంయుత్తో భవే అహం.

౧౩౬. ‘‘దేయ్యధమ్మో చ మే నత్థి, వరాకో భతకో అహం;

యంనూనాహం పఞ్చసీలం, రక్ఖేయ్యం పరిపూరయం.

౧౩౭. ‘‘అనోమదస్సిస్స మునినో, నిసభో నామ సావకో;

తమహం ఉపసఙ్కమ్మ, పఞ్చసిక్ఖాపదగ్గహిం.

౧౩౮. ‘‘వస్ససతసహస్సాని, ఆయు విజ్జతి తావదే;

తావతా పఞ్చసీలాని, పరిపుణ్ణాని గోపయిం.

౧౩౯. ‘‘మచ్చుకాలే చ సమ్పత్తే, దేవా అస్సాసయన్తి మం;

‘రథో సహస్సయుత్తో తే, మారిసాయం [మారిసస్స (క.)] ఉపట్ఠితో’.

౧౪౦. ‘‘వత్తన్తే చరిమే చిత్తే, మమ సీలం అనుస్సరిం;

తేన కమ్మేన సుకతేన, తావతింసం అగచ్ఛహం.

౧౪౧. ‘‘తింసక్ఖత్తుఞ్చ దేవిన్దో, దేవరజ్జమకారయిం;

దిబ్బసుఖం [దిబ్బం సుఖం (సీ.)] అనుభవిం, అచ్ఛరాహి పురక్ఖతో.

౧౪౨. ‘‘పఞ్చసత్తతిక్ఖత్తుఞ్చ, చక్కవత్తీ అహోసహం;

పదేసరజ్జం విపులం, గణనాతో అసఙ్ఖియం.

౧౪౩. ‘‘దేవలోకా చవిత్వాన, సుక్కమూలేన చోదితో;

పురే వేసాలియం జాతో, మహాసాలే సుఅడ్ఢకే.

౧౪౪. ‘‘వస్సూపనాయికే కాలే, దిప్పన్తే [దిబ్బన్తి (క.)] జినసాసనే;

మాతా చ మే పితా చేవ, పఞ్చసిక్ఖాపదగ్గహుం.

౧౪౫. ‘‘సహ సుత్వానహం సీలం, మమ సీలం అనుస్సరిం;

ఏకాసనే నిసీదిత్వా, అరహత్తమపాపుణిం.

౧౪౬. ‘‘జాతియా పఞ్చవస్సేన, అరహత్తమపాపుణిం;

ఉపసమ్పాదయి బుద్ధో, గుణమఞ్ఞాయ చక్ఖుమా.

౧౪౭. ‘‘పరిపుణ్ణాని గోపేత్వా, పఞ్చసిక్ఖాపదానహం;

అపరిమేయ్యే ఇతో కప్పే, వినిపాతం న గచ్ఛహం.

౧౪౮. ‘‘స్వాహం యసమనుభవిం, తేసం సీలాన వాహసా;

కప్పకోటిమ్పి కిత్తేన్తో, కిత్తయే ఏకదేసకం.

౧౪౯. ‘‘పఞ్చసీలాని గోపేత్వా, తయో హేతూ లభామహం;

దీఘాయుకో మహాభోగో, తిక్ఖపఞ్ఞో భవామహం.

౧౫౦. ‘‘సంకిత్తేన్తో చ [పకిత్తేన్తోవ (సీ.), పకిత్తేన్తే చ (స్యా.)] సబ్బేసం, అభిమత్తఞ్చ పోరిసం;

భవాభవే సంసరిత్వా, ఏతే ఠానే లభామహం.

౧౫౧. ‘‘అపరిమేయ్యసీలేసు, వత్తన్తా జినసావకా;

భవేసు యది రజ్జేయ్యుం, విపాకో కీదిసో భవే.

౧౫౨. ‘‘సుచిణ్ణం మే పఞ్చసీలం, భతకేన తపస్సినా [విపస్సినా (సీ.)];

తేన సీలేనహం అజ్జ, మోచయిం సబ్బబన్ధనా.

౧౫౩. ‘‘అపరిమేయ్యే ఇతో కప్పే, పఞ్చసీలాని గోపయిం;

దుగ్గతిం నాభిజానామి, పఞ్చసీలానిదం ఫలం.

౧౫౪. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా పఞ్చసీలసమాదానియో థేరో ఇమా గాథాయో అభాసిత్థాతి.

పఞ్చసీలసమాదానియత్థేరస్సాపదానం చతుత్థం.