౨. ఉపవానత్థేరఅపదానం
౫౨. ‘‘పదుముత్తరో నామ జినో, సబ్బధమ్మాన పారగూ;
జలిత్వా అగ్గిక్ఖన్ధోవ, సమ్బుద్ధో పరినిబ్బుతో.
౫౩. ‘‘మహాజనా సమాగమ్మ, పూజయిత్వా తథాగతం;
చితం కత్వాన సుకతం, సరీరం అభిరోపయుం.
౫౪. ‘‘సరీరకిచ్చం కత్వాన, ధాతుం తత్థ సమానయుం;
సదేవమానుసా సబ్బే, బుద్ధథూపం అకంసు తే.
౫౫. ‘‘పఠమా కఞ్చనమయా, దుతియాసి మణీమయా;
తతియా రూపియమయా, చతుత్థీ ఫలికామయా.
౫౬. ‘‘తథా [తత్థ (స్యా. క.)] పఞ్చమియా భూమి [నేమి (సీ.)], లోహితఙ్గమయా అహు;
ఛట్ఠా మసారగల్లస్స, సబ్బరతనమయూపరి.
౫౭. ‘‘జఙ్ఘా మణిమయా ఆసి, వేదికా రతనమయా;
సబ్బసోణ్ణమయో థూపో, ఉద్ధం యోజనముగ్గతో.
౫౮. ‘‘దేవా తత్థ సమాగన్త్వా, ఏకతో మన్తయుం తదా;
మయమ్పి థూపం కస్సామ, లోకనాథస్స తాదినో.
౫౯. ‘‘ధాతు ఆవేణికా నత్థి, సరీరం ఏకపిణ్డితం;
ఇమమ్హి బుద్ధథూపమ్హి, కస్సామ కఞ్చుకం మయం.
౬౦. ‘‘దేవా సత్తహి రత్నేహి [సత్తరతనేహి (సీ.)], అఞ్ఞం వడ్ఢేసు యోజనం;
థూపో ద్వియోజనుబ్బేధో, తిమిరం బ్యపహన్తి సో.
౬౧. ‘‘నాగా తత్థ సమాగన్త్వా, ఏకతో మన్తయుం తదా;
మనుస్సా చేవ దేవా చ, బుద్ధథూపం అకంసు తే.
౬౨. ‘‘మా నో పమత్తా అస్సుమ్హ [అస్సుమ్హా (సీ. స్యా.), ఆసిమ్హా (?)], అప్పమత్తా సదేవకా;
మయమ్పి థూపం కస్సామ, లోకనాథస్స తాదినో.
౬౩. ‘‘ఇన్దనీలం మహానీలం, అథో జోతిరసం మణిం;
ఏకతో సన్నిపాతేత్వా, బుద్ధథూపం అఛాదయుం.
౬౪. ‘‘సబ్బం మణిమయం ఆసి, తావతా బుద్ధచేతియం;
తియోజనసముబ్బిద్ధం [తీణి యోజనముబ్బిద్ధం (సీ. క.)], ఆలోకకరణం తదా.
౬౫. ‘‘గరుళా చ సమాగన్త్వా, ఏకతో మన్తయుం తదా;
మనుస్సా దేవా నాగా చ, బుద్ధథూపం అకంసు తే.
౬౬. ‘‘‘మా నో పమత్తా అస్సుమ్హ, అప్పమత్తా సదేవకా;
మయమ్పి థూపం కస్సామ, లోకనాథస్స తాదినో’.
౬౭. ‘‘సబ్బం మణిమయం థూపం, అకరుం తే చ కఞ్చుకం [సబ్బమణిమయం థూపే, అకరుత్తరకఞ్చుకం (సీ.)];
యోజనం తేపి వడ్ఢేసుం, ఆయతం బుద్ధచేతియం.
౬౮. ‘‘చతుయోజనముబ్బిద్ధో, బుద్ధథూపో విరోచతి;
ఓభాసేతి దిసా సబ్బా, సతరంసీవ ఉగ్గతో.
౬౯. ‘‘కుమ్భణ్డా చ సమాగన్త్వా, ఏకతో మన్తయుం తదా;
మనుస్సా చేవ దేవా చ, నాగా చ గరుళా తథా.
పచ్చేకం బుద్ధసేట్ఠస్స, అకంసు థూపముత్తమం.
౭౦. ‘‘‘మా నో పమత్తా అస్సుమ్హ, అప్పమత్తా సదేవకా;
మయమ్పి థూపం కస్సామ, లోకనాథస్స తాదినో;
రతనేహి ఛాదేస్సామ, ఆయతం బుద్ధచేతియం’.
౭౧. ‘‘యోజనం తేపి వడ్ఢేసుం, ఆయతం బుద్ధచేతియం;
పఞ్చయోజనముబ్బిద్ధో, థూపో ఓభాసతే తదా.
౭౨. ‘‘యక్ఖా తత్థ సమాగన్త్వా, ఏకతో మన్తయుం తదా;
మనుస్సా దేవా నాగా చ, గరుళా కుమ్భఅణ్డకా.
౭౩. ‘‘పచ్చేకం బుద్ధసేట్ఠస్స, అకంసు థూపముత్తమం;
‘మా నో పమత్తా అస్సుమ్హ, అప్పమత్తా సదేవకా.
౭౪. ‘‘‘మయమ్పి థూపం కస్సామ, లోకనాథస్స తాదినో;
ఫలికాహి ఛాదేస్సామ, ఆయతం బుద్ధచేతియం’.
౭౫. ‘‘యోజనం తేపి వడ్ఢేసుం, ఆయతం బుద్ధచేతియం;
ఛ యోజనాని ఉబ్బిద్ధో, థూపో ఓభాసతే తదా.
౭౬. ‘‘గన్ధబ్బా చ సమాగన్త్వా, ఏకతో మన్తయుం తదా;
‘మనుజా దేవతా నాగా, గరుళా కుమ్భయక్ఖకా.
౭౭. ‘‘‘సబ్బేకంసు బుద్ధథూపం, మయమేత్థ అకారకా;
మయమ్పి థూపం కస్సామ, లోకనాథస్స తాదినో’.
౭౮. ‘‘వేదియో సత్త కత్వాన, ఛత్తమారోపయింసు తే;
సబ్బసోణ్ణమయం థూపం, గన్ధబ్బా కారయుం తదా.
౭౯. ‘‘సత్తయోజనముబ్బిద్ధో, థూపో ఓభాసతే తదా;
రత్తిన్దివా న ఞాయన్తి, ఆలోకో హోతి [ఆలోకా హోన్తి (స్యా. క.)] సబ్బదా.
౮౦. ‘‘అభిభోన్తి న తస్సాభా, చన్దసూరా సతారకా;
సమన్తా యోజనసతే, పదీపోపి న పజ్జలి.
౮౧. ‘‘తేన కాలేన యే కేచి, థూపం పూజేన్తి మానుసా;
న తే థూపమారుహన్తి, అమ్బరే ఉక్ఖిపన్తి తే.
౮౨. ‘‘దేవేహి ఠపితో యక్ఖో, అభిసమ్మతనామకో;
ధజం వా పుప్ఫదామం వా, అభిరోపేతి ఉత్తరి.
౮౩. ‘‘న తే పస్సన్తి తం యక్ఖం, దామం పస్సన్తి గచ్ఛతో;
ఏవం పస్సిత్వా గచ్ఛన్తా, సబ్బే గచ్ఛన్తి సుగ్గతిం.
౮౪. ‘‘విరుద్ధా [విసద్ధా (సీ.)] యే పావచనే, పసన్నా యే చ సాసనే;
పాటిహేరం దట్ఠుకామా, థూపం పూజేన్తి మానుసా.
౮౫. ‘‘నగరే హంసవతియా, అహోసిం భతకో [వరకో (స్యా. క.)] తదా;
ఆమోదితం జనం దిస్వా, ఏవం చిన్తేసహం తదా.
౮౬. ‘‘‘ఉళారో భగవా హేసో, యస్స ధాతుధరేదిసం;
ఇమా చ జనతా తుట్ఠా, కారం కుబ్బం న తప్పరే [కుబ్బన్తనప్పకం (సీ.)].
౮౭. ‘‘‘అహమ్పి కారం కస్సామి, లోకనాథస్స తాదినో;
తస్స ధమ్మేసు దాయాదో, భవిస్సామి అనాగతే’.
౮౮. ‘‘సుధోతం రజకేనాహం, ఉత్తరేయ్యపటం మమ;
వేళగ్గే ఆలగేత్వాన, ధజం ఉక్ఖిపిమమ్బరే.
౮౯. ‘‘అభిసమ్మతకో గయ్హ, అమ్బరేహాసి మే ధజం;
వాతేరితం ధజం దిస్వా, భియ్యో హాసం జనేసహం.
౯౦. ‘‘తత్థ చిత్తం పసాదేత్వా, సమణం ఉపసఙ్కమిం;
తం భిక్ఖుం అభివాదేత్వా, విపాకం పుచ్ఛహం ధజే.
౯౧. ‘‘సో మే కథేసి ఆనన్ద, పీతిసఞ్జననం మమ;
‘తస్స ధజస్స విపాకం, అనుభోస్ససి సబ్బదా.
౯౨. ‘‘‘హత్థీ అస్సా రథా పత్తీ, సేనా చ చతురఙ్గినీ;
పరివారేస్సన్తి తం నిచ్చం, ధజదానస్సిదం ఫలం.
౯౩. ‘‘‘సట్ఠితూరియసహస్సాని, భేరియో సమలఙ్కతా;
పరివారేస్సన్తి తం నిచ్చం, ధజదానస్సిదం ఫలం.
౯౪. ‘‘‘ఛళాసీతిసహస్సాని, నారియో సమలఙ్కతా;
విచిత్తవత్థాభరణా, ఆముత్తమణికుణ్డలా.
౯౫. ‘‘‘అళారపమ్హా హసులా, సుసఞ్ఞా తనుమజ్ఝిమా;
పరివారేస్సన్తి తం నిచ్చం, ధజదానస్సిదం ఫలం.
౯౬. ‘‘‘తింసకప్పసహస్సాని, దేవలోకే రమిస్ససి;
అసీతిక్ఖత్తుం దేవిన్దో, దేవరజ్జం కరిస్ససి.
౯౭. ‘‘‘సహస్సక్ఖత్తుం రాజా చ, చక్కవత్తీ భవిస్ససి;
పదేసరజ్జం విపులం, గణనాతో అసఙ్ఖియం.
౯౮. ‘‘‘కప్పసతసహస్సమ్హి, ఓక్కాకకులసమ్భవో;
గోతమో నామ గోత్తేన, సత్థా లోకే భవిస్సతి.
౯౯. ‘‘‘దేవలోకా చవిత్వాన, సుక్కమూలేన చోదితో;
పుఞ్ఞకమ్మేన సంయుత్తో, బ్రహ్మబన్ధు భవిస్ససి.
౧౦౦. ‘‘‘అసీతికోటిం ఛడ్డేత్వా, దాసే కమ్మకరే బహూ;
గోతమస్స భగవతో, సాసనే పబ్బజిస్ససి.
౧౦౧. ‘‘‘ఆరాధయిత్వా సమ్బుద్ధం, గోతమం సక్యపుఙ్గవం;
ఉపవానోతి నామేన, హేస్ససి సత్థు సావకో’.
౧౦౨. ‘‘సతసహస్సే కతం కమ్మం, ఫలం దస్సేసి మే ఇధ;
సుముత్తో సరవేగోవ కిలేసే ఝాపయీ మమ.
౧౦౩. ‘‘చక్కవత్తిస్స సన్తస్స, చతుదీపిస్సరస్స మే;
తియోజనాని సమన్తా, ఉస్సీసన్తి ధజా సదా.
౧౦౪. ‘‘సతసహస్సితో కప్పే, యం కమ్మమకరిం తదా;
దుగ్గతిం నాభిజానామి, ధజదానస్సిదం ఫలం.
౧౦౫. ‘‘పటిసమ్భిదా చతస్సో, విమోక్ఖాపి చ అట్ఠిమే;
ఛళభిఞ్ఞా సచ్ఛికతా, కతం బుద్ధస్స సాసనం’’.
ఇత్థం సుదం ఆయస్మా ఉపవానో థేరో ఇమా గాథాయో అభాసిత్థాతి.
ఉపవానత్థేరస్సాపదానం దుతియం.