౧. సుభూతిత్థేరఅపదానం

౧. ‘‘హిమవన్తస్సావిదూరే, నిసభో నామ పబ్బతో;

అస్సమో సుకతో మయ్హం, పణ్ణసాలా సుమాపితా.

౨. ‘‘కోసియో నామ నామేన, జటిలో ఉగ్గతాపనో;

ఏకాకియో [ఏకాకికో (క.)] అదుతియో, వసామి నిసభే తదా.

౩. ‘‘ఫలం మూలఞ్చ పణ్ణఞ్చ, న భుఞ్జామి అహం తదా;

పవత్తంవ సుపాతాహం [పవత్తపణ్డుపత్తాని (సీ.)], ఉపజీవామి తావదే.

౪. ‘‘నాహం కోపేమి ఆజీవం, చజమానోపి జీవితం;

ఆరాధేమి సకం చిత్తం, వివజ్జేమి అనేసనం.

౫. ‘‘రాగూపసంహితం చిత్తం, యదా ఉప్పజ్జతే మమ;

సయంవ పచ్చవేక్ఖామి, ఏకగ్గో తం దమేమహం.

౬. ‘‘‘రజ్జసే రజ్జనీయే చ, దుస్సనీయే చ దుస్ససే;

ముయ్హసే మోహనీయే చ, నిక్ఖమస్సు వనా తువం.

౭. ‘‘‘విసుద్ధానం అయం వాసో, నిమ్మలానం తపస్సినం;

మా ఖో విసుద్ధం దూసేసి, నిక్ఖమస్సు వనా తువం.

౮. ‘‘‘అగారికో భవిత్వాన, యదా పుత్తం [సదాయుత్తం (సీ.), యదాయుత్తం (స్యా.)], లభిస్ససి;

ఉభోపి మా విరాధేసి, నిక్ఖమస్సు వనా తువం.

౯. ‘‘‘ఛవాలాతం యథా కట్ఠం, న క్వచి కిచ్చకారకం;

నేవ గామే అరఞ్ఞే వా, న హి తం కట్ఠసమ్మతం.

౧౦. ‘‘‘ఛవాలాతూపమో త్వంసి, న గిహీ నాపి సఞ్ఞతో;

ఉభతో ముత్తకో అజ్జ, నిక్ఖమస్సు వనా తువం.

౧౧. ‘‘‘సియా ను ఖో తవ ఏతం, కో పజానాతి తే ఇదం;

సద్ధాధురం వహిసి [సద్ధాధురం జహసి (సీ.), సీఘం ధురం వహిసి (స్యా.)] మే, కోసజ్జబహులాయ చ.

౧౨. ‘‘‘జిగుచ్ఛిస్సన్తి తం విఞ్ఞూ, అసుచిం నాగరికో యథా;

ఆకడ్ఢిత్వాన ఇసయో, చోదయిస్సన్తి తం సదా.

౧౩. ‘‘‘తం విఞ్ఞూ పవదిస్సన్తి, సమతిక్కన్తసాసనం;

సంవాసం అలభన్తో హి, కథం జీవిహిసి [జీవిస్ససి (సీ.)] తువం.

౧౪. ‘‘‘తిధాపభిన్నం మాతఙ్గం, కుఞ్జరం సట్ఠిహాయనం;

బలీ నాగో ఉపగన్త్వా, యూథా నీహరతే గజం.

౧౫. ‘‘‘యూథా వినిస్సటో సన్తో, సుఖం సాతం న విన్దతి;

దుక్ఖితో విమనో హోతి, పజ్ఝాయన్తో పవేధతి.

౧౬. ‘‘‘తథేవ జటిలా తమ్పి, నీహరిస్సన్తి దుమ్మతిం;

తేహి త్వం నిస్సటో సన్తో, సుఖం సాతం న లచ్ఛసి.

౧౭. ‘‘‘దివా వా యది వా రత్తిం, సోకసల్లసమప్పితో;

డయ్హసి పరిళాహేన, గజో యూథావ నిస్సటో.

౧౮. ‘‘‘జాతరూపం యథా కూటం, నేవ ఝాయతి [యాయతి (స్యా.)] కత్థచి;

తథా సీలవిహీనో త్వం, న ఝాయిస్ససి [యారిస్సతి (స్యా.)] కత్థచి.

౧౯. ‘‘‘అగారం వసమానోపి, కథం జీవిహిసి తువం;

మత్తికం పేత్తికఞ్చాపి, నత్థి తే నిహితం ధనం.

౨౦. ‘‘‘సయం కమ్మం కరిత్వాన, గత్తే సేదం పమోచయం;

ఏవం జీవిహిసి గేహే, సాధు తే తం న రుచ్చతి.

౨౧. ‘‘‘ఏవాహం తత్థ వారేమి, సంకిలేసగతం మనం;

నానాధమ్మకథం కత్వా, పాపా చిత్తం నివారయిం’.

౨౨. ‘‘ఏవం మే విహరన్తస్స, అప్పమాదవిహారినో;

తింసవస్ససహస్సాని, విపినే మే అతిక్కముం.

౨౩. ‘‘అప్పమాదరతం దిస్వా, ఉత్తమత్థం గవేసకం;

పదుముత్తరసమ్బుద్ధో, ఆగచ్ఛి మమ సన్తికం.

౨౪. ‘‘తిమ్బరూసకవణ్ణాభో, అప్పమేయ్యో అనూపమో;

రూపేనాసదిసో బుద్ధో, ఆకాసే చఙ్కమీ తదా.

౨౫. ‘‘సుఫుల్లో సాలరాజావ, విజ్జూవబ్భఘనన్తరే;

ఞాణేనాసదిసో బుద్ధో, ఆకాసే చఙ్కమీ తదా.

౨౬. ‘‘సీహరాజా వసమ్భీతో [ఛమ్భితో (క.)],

గజరాజావ దప్పితో [దమ్మితో (క.)].

లాసితో [అభీతో (స్యా.)] బ్యగ్ఘరాజావ, ఆకాసే చఙ్కమీ తదా.

౨౭. ‘‘సిఙ్గీనిక్ఖసవణ్ణాభో, ఖదిరఙ్గారసన్నిభో;

మణి యథా జోతిరసో, ఆకాసే చఙ్కమీ తదా.

౨౮. ‘‘విసుద్ధకేలాసనిభో, పుణ్ణమాయేవ చన్దిమా;

మజ్ఝన్హికేవ [మజ్ఝన్తికేవ (సబ్బత్థ)] సూరియో, ఆకాసే చఙ్కమీ తదా.

౨౯. ‘‘దిస్వా నభే చఙ్కమన్తం, ఏవం చిన్తేసహం తదా;

‘దేవో ను ఖో అయం సత్తో, ఉదాహు మనుజో అయం.

౩౦. ‘‘‘న మే సుతో వా దిట్ఠో వా, మహియా ఏదిసో నరో;

అపి మన్తపదం అత్థి, అయం సత్థా భవిస్సతి’.

౩౧. ‘‘ఏవాహం చిన్తయిత్వాన, సకం చిత్తం పసాదయిం;

నానాపుప్ఫఞ్చ గన్ధఞ్చ, సన్నిపాతేసహం [సన్నిపాతేత్వాహం (సీ.)] తదా.

౩౨. ‘‘పుప్ఫాసనం పఞ్ఞపేత్వా, సాధుచిత్తం మనోరమం;

నరసారథినం అగ్గం, ఇదం వచనమబ్రవిం.

౩౩. ‘‘‘ఇదం మే ఆసనం వీర, పఞ్ఞత్తం తవనుచ్ఛవం;

హాసయన్తో మమం చిత్తం, నిసీద కుసుమాసనే’.

౩౪. ‘‘నిసీది తత్థ భగవా, అసమ్భీతోవ [అఛమ్భితోవ (క.)] కేసరీ;

సత్తరత్తిన్దివం బుద్ధో, పవరే కుసుమాసనే.

౩౫. ‘‘నమస్సమానో అట్ఠాసిం, సత్తరత్తిన్దివం అహం;

వుట్ఠహిత్వా సమాధిమ్హా, సత్థా లోకే అనుత్తరో;

మమ కమ్మం పకిత్తేన్తో, ఇదం వచనమబ్రవి.

౩౬. ‘‘‘భావేహి బుద్ధానుస్సతిం, భావనానమనుత్తరం;

ఇమం సతిం భావయిత్వా, పూరయిస్ససి మానసం.

౩౭. ‘‘‘తింసకప్పసహస్సాని, దేవలోకే రమిస్ససి;

అసీతిక్ఖత్తుం దేవిన్దో, దేవరజ్జం కరిస్ససి;

సహస్సక్ఖత్తుం చక్కవత్తీ, రాజా రట్ఠే భవిస్ససి.

౩౮. ‘‘‘పదేసరజ్జం విపులం, గణనాతో అసఙ్ఖియం;

అనుభోస్ససి తం సబ్బం, బుద్ధానుస్సతియా ఫలం.

౩౯. ‘‘‘భవాభవే సంసరన్తో, మహాభోగం లభిస్ససి;

భోగే తే ఊనతా నత్థి, బుద్ధానుస్సతియా ఫలం.

౪౦. ‘‘‘కప్పసతసహస్సమ్హి, ఓక్కాకకులసమ్భవో;

గోతమో నామ గోత్తేన, సత్థా లోకే భవిస్సతి.

౪౧. ‘‘‘అసీతికోటిం ఛడ్డేత్వా, దాసే కమ్మకరే బహూ;

గోతమస్స భగవతో, సాసనే పబ్బజిస్ససి.

౪౨. ‘‘‘ఆరాధయిత్వా సమ్బుద్ధం, గోతమం సక్యపుఙ్గవం;

సుభూతి నామ నామేన, హేస్సతి సత్థు సావకో.

౪౩. ‘‘‘భిక్ఖుసఙ్ఘే నిసీదిత్వా, దక్ఖిణేయ్యగుణమ్హి తం;

తథారణవిహారే చ, ద్వీసు అగ్గే ఠపేస్సతి’.

౪౪. ‘‘ఇదం వత్వాన సమ్బుద్ధో, జలజుత్తమనామకో;

నభం అబ్భుగ్గమీ వీరో, హంసరాజావ అమ్బరే.

౪౫. ‘‘సాసితో లోకనాథేన, నమస్సిత్వా తథాగతం;

సదా భావేమి ముదితో, బుద్ధానుస్సతిముత్తమం.

౪౬. ‘‘తేన కమ్మేన సుకతేన, చేతనాపణిధీహి చ;

జహిత్వా మానుసం దేహం, తావతింసం అగచ్ఛహం.

౪౭. ‘‘అసీతిక్ఖత్తుం దేవిన్దో, దేవరజ్జమకారయిం;

సహస్సక్ఖత్తుం రాజా చ, చక్కవత్తీ అహోసహం.

౪౮. ‘‘పదేసరజ్జం విపులం, గణనాతో అసఙ్ఖియం;

అనుభోమి సుసమ్పత్తిం, బుద్ధానుస్సతియా ఫలం.

౪౯. ‘‘భవాభవే సంసరన్తో, మహాభోగం లభామహం;

భోగే మే ఊనతా నత్థి, బుద్ధానుస్సతియా ఫలం.

౫౦. ‘‘సతసహస్సితో కప్పే, యం కమ్మమకరిం తదా;

దుగ్గతిం నాభిజానామి, బుద్ధానుస్సతియా ఫలం.

౫౧. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా సుభూతి థేరో ఇమా గాథాయో అభాసిత్థాతి.

సుభూతిత్థేరస్సాపదానం పఠమం.