౨౮. సువణ్ణబిబ్బోహనవగ్గో
౧. సువణ్ణబిబ్బోహనియత్థేరఅపదానం
౧. ‘‘ఏకాసనం అహమదం, పసన్నో సేహి పాణిభి;
బిబ్బోహనఞ్చ [బిమ్బోహనఞ్చ (సీ. పీ.)] పాదాసిం, ఉత్తమత్థస్స పత్తియా.
౨. ‘‘ఏకనవుతితో కప్పే, బిబ్బోహనమదాసహం;
దుగ్గతిం నాభిజానామి, బిబ్బోహనస్సిదం ఫలం.
౩. ‘‘ఇతో తేసట్ఠిమే కప్పే, అసమో నామ ఖత్తియో;
సత్తరతనసమ్పన్నో, చక్కవత్తీ మహబ్బలో.
౪. ‘‘పటిసమ్భిదా చతస్సో, విమోక్ఖాపి చ అట్ఠిమే;
ఛళభిఞ్ఞా సచ్ఛికతా, కతం బుద్ధస్స సాసనం’’.
ఇత్థం సుదం ఆయస్మా సువణ్ణబిబ్బోహనియో థేరో ఇమా గాథాయో అభాసిత్థాతి.
సువణ్ణబిబ్బోహనియత్థేరస్సాపదానం పఠమం.
౨. తిలముట్ఠిదాయకత్థేరఅపదానం
౫. ‘‘మమ సఙ్కప్పమఞ్ఞాయ, సత్థా లోకగ్గనాయకో;
మనోమయేన కాయేన, ఇద్ధియా ఉపసఙ్కమి.
౬. ‘‘సత్థారం ఉపసఙ్కన్తం, వన్దిత్వా పురిసుత్తమం;
పసన్నచిత్తో సుమనో, తిలముట్ఠిమదాసహం.
౭. ‘‘ఏకనవుతితో కప్పే, యం దానమదదిం తదా;
దుగ్గతిం నాభిజానామి, తిలముట్ఠియిదం ఫలం.
౮. ‘‘ఇతో సోళసకప్పమ్హి, తన్తిసో [ఖన్తియో (స్యా.)] నామ ఖత్తియో;
సత్తరతనసమ్పన్నో, చక్కవత్తీ మహబ్బలో.
౯. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా తిలముట్ఠిదాయకో థేరో ఇమా గాథాయో అభాసిత్థాతి.
తిలముట్ఠిదాయకత్థేరస్సాపదానం దుతియం.
౩. చఙ్కోటకియత్థేరఅపదానం
౧౦. ‘‘మహాసముద్దం నిస్సాయ, వసతీ పబ్బతన్తరే;
పచ్చుగ్గన్త్వాన కత్వాన [పచ్చుగ్గన్త్వాన’కాసహం (అట్ఠ.), పచ్చుగ్గమనం కత్వాన (?)], చఙ్కోటక [చఙ్గోటక (సీ.)] మదాసహం.
౧౧. ‘‘సిద్ధత్థస్స మహేసినో, సబ్బసత్తానుకమ్పినో [సయమ్భుస్సానుకమ్పినో (స్యా.)];
పుప్ఫచఙ్కోటకం దత్వా, కప్పం సగ్గమ్హి మోదహం.
౧౨. ‘‘చతున్నవుతితో కప్పే, చఙ్కోటకమదం తదా;
దుగ్గతిం నాభిజానామి, చఙ్కోటకస్సిదం ఫలం.
౧౩. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా చఙ్కోటకియో థేరో ఇమా గాథాయో అభాసిత్థాతి.
చఙ్కోటకియత్థేరస్సాపదానం తతియం.
౪. అబ్భఞ్జనదాయకత్థేరఅపదానం
౧౪. ‘‘కోణ్డఞ్ఞస్స భగవతో, వీతరాగస్స తాదినో;
ఆకాససమచిత్తస్స [అకక్కసచిత్తస్సాథ (అట్ఠ.)], నిప్పపఞ్చస్స ఝాయినో.
౧౫. ‘‘సబ్బమోహాతివత్తస్స, సబ్బలోకహితేసినో;
అబ్భఞ్జనం మయా దిన్నం, ద్విపదిన్దస్స తాదినో.
౧౬. ‘‘అపరిమేయ్యే ఇతో కప్పే, అబ్భఞ్జనమదం తదా [అమ్భఞ్జనమదాసహం (స్యా.)];
దుగ్గతిం నాభిజానామి, అబ్భఞ్జనస్సిదం ఫలం.
౧౭. ‘‘ఇతో పన్నరసే కప్పే, చిరప్పో నామ ఖత్తియో;
సత్తరతనసమ్పన్నో, చక్కవత్తీ మహబ్బలో.
౧౮. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా అబ్భఞ్జనదాయకో థేరో ఇమా గాథాయో అభాసిత్థాతి.
అబ్భఞ్జనదాయకత్థేరస్సాపదానం చతుత్థం.
౫. ఏకఞ్జలికత్థేరఅపదానం
౧౯. ‘‘ఉదుమ్బరే వసన్తస్స, నియతే పణ్ణసన్థరే;
వుత్థోకాసో మయా దిన్నో, సమణస్స మహేసినో.
౨౦. ‘‘తిస్సస్స ద్విపదిన్దస్స, లోకనాథస్స తాదినో;
అఞ్జలిం పగ్గహేత్వాన, సన్థరిం పుప్ఫసన్థరం.
౨౧. ‘‘ద్వేనవుతే ఇతో కప్పే, యం కరిం పుప్ఫసన్థరం;
దుగ్గతిం నాభిజానామి, సన్థరస్స ఇదం ఫలం.
౨౨. ‘‘ఇతో చుద్దసకప్పమ్హి, అహోసిం మనుజాధిపో;
ఏకఅఞ్జలికో నామ, చక్కవత్తీ మహబ్బలో.
౨౩. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా ఏకఞ్జలికో థేరో ఇమా గాథాయో అభాసిత్థాతి.
ఏకఞ్జలికత్థేరస్సాపదానం పఞ్చమం.
౬. పోత్థకదాయకత్థేరఅపదానం
౨౪. ‘‘సత్థారం ధమ్మమారబ్భ, సఙ్ఘఞ్చాపి మహేసినం;
పోత్థదానం మయా దిన్నం, దక్ఖిణేయ్యే అనుత్తరే.
౨౫. ‘‘ఏకనవుతితో కప్పే, యం కమ్మమకరిం తదా;
దుగ్గతిం నాభిజానామి, పోత్థదానస్సిదం ఫలం.
౨౬. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా పోత్థకదాయకో థేరో ఇమా గాథాయో అభాసిత్థాతి.
పోత్థకదాయకత్థేరస్సాపదానం ఛట్ఠం.
౭. చితకపూజకత్థేరఅపదానం
౨౭. ‘‘చన్దభాగానదీతీరే, అనుసోతం వజామహం;
సత్త మాలువపుప్ఫాని, చితమారోపయిం అహం.
౨౮. ‘‘చతున్నవుతితో కప్పే, చితకం యమపూజయిం;
దుగ్గతిం నాభిజానామి, చితపూజాయిదం ఫలం.
౨౯. ‘‘సత్తసట్ఠిమ్హితో కప్పే, పటిజగ్గసనామకా;
సత్తరతనసమ్పన్నా, సత్తాసుం చక్కవత్తినో [పటిజగ్గసనామకో; సత్తరతనసమ్పన్నో, చక్కవత్తీ మహబ్బలో (స్యా.)].
౩౦. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా చితకపూజకో థేరో ఇమా గాథాయో అభాసిత్థాతి.
చితకపూజకత్థేరస్సాపదానం సత్తమం.
౮. ఆలువదాయకత్థేరఅపదానం
౩౧. ‘‘పబ్బతే హిమవన్తమ్హి, మహాసిన్ధు సుదస్సనా;
తత్థద్దసం వీతరాగం, సుప్పభాసం సుదస్సనం.
౩౨. ‘‘పరమోపసమే యుత్తం, దిస్వా విమ్హితమానసో;
ఆలువం తస్స పాదాసిం, పసన్నో సేహి పాణిభి.
౩౩. ‘‘ఏకత్తింసే ఇతో కప్పే, యం ఫలమదదిం తదా;
దుగ్గతిం నాభిజానామి, ఆలువస్స ఇదం ఫలం.
౩౪. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా ఆలువదాయకో థేరో ఇమా గాథాయో అభాసిత్థాతి.
ఆలువదాయకత్థేరస్సాపదానం అట్ఠమం.
౯. ఏకపుణ్డరీకత్థేరఅపదానం
౩౫. ‘‘రోమసో నామ నామేన, సయమ్భూ సుబ్బతో [సప్పభో (స్యా.)] తదా;
పుణ్డరీకం మయా దిన్నం, విప్పసన్నేన చేతసా.
౩౬. ‘‘చతున్నవుతితో కప్పే, పుణ్డరీకమదం తదా;
దుగ్గతిం నాభిజానామి, పుణ్డరీకస్సిదం ఫలం.
౩౭. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా ఏకపుణ్డరీకో థేరో ఇమా గాథాయో అభాసిత్థాతి.
ఏకపుణ్డరీకత్థేరస్సాపదానం నవమం.
౧౦. తరణీయత్థేరఅపదానం
౩౮. ‘‘మహాపథమ్హి విసమే, సేతు కారాపితో మయా;
తరణత్థాయ లోకస్స, పసన్నో సేహి పాణిభి.
౩౯. ‘‘ఏకనవుతితో కప్పే, యో సేతు కారితో మయా;
దుగ్గతిం నాభిజానామి, సేతుదానస్సిదం ఫలం.
౪౦. ‘‘పఞ్చపఞ్ఞాసితో కప్పే, ఏకో ఆసిం సమోగధో;
సత్తరతనసమ్పన్నో, చక్కవత్తీ మహబ్బలో.
౪౧. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా తరణీయో థేరో ఇమా గాథాయో అభాసిత్థాతి.
తరణీయత్థేరస్సాపదానం దసమం.
సువణ్ణబిబ్బోహనవగ్గో అట్ఠవీసతిమో.