౧. ఆకాసుక్ఖిపియత్థేరఅపదానం

౧. ‘‘సువణ్ణవణ్ణం సిద్ధత్థం, గచ్ఛన్తం అన్తరాపణే;

జలజగ్గే దువే గయ్హ, ఉపాగచ్ఛిం నరాసభం.

౨. ‘‘ఏకఞ్చ పుప్ఫం పాదేసు, బుద్ధసేట్ఠస్స నిక్ఖిపిం;

ఏకఞ్చ పుప్ఫం పగ్గయ్హ, ఆకాసే ఉక్ఖిపిం అహం.

౩. ‘‘చతున్నవుతితో కప్పే, యం పుప్ఫమభిరోపయిం;

దుగ్గతిం నాభిజానామి, పుప్ఫదానస్సిదం ఫలం.

౪. ‘‘ఇతో ఛత్తింసకప్పమ్హి, ఏకో ఆసిం మహీపతి;

అన్తలిక్ఖకరో నామ, చక్కవత్తీ మహబ్బలో.

౫. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా ఆకాసుక్ఖిపియో థేరో ఇమా గాథాయో అభాసిత్థాతి.

ఆకాసుక్ఖిపియత్థేరస్సాపదానం పఠమం.