౨౭. పదుముక్ఖిపవగ్గో

౧. ఆకాసుక్ఖిపియత్థేరఅపదానం

౧. ‘‘సువణ్ణవణ్ణం సిద్ధత్థం, గచ్ఛన్తం అన్తరాపణే;

జలజగ్గే దువే గయ్హ, ఉపాగచ్ఛిం నరాసభం.

౨. ‘‘ఏకఞ్చ పుప్ఫం పాదేసు, బుద్ధసేట్ఠస్స నిక్ఖిపిం;

ఏకఞ్చ పుప్ఫం పగ్గయ్హ, ఆకాసే ఉక్ఖిపిం అహం.

౩. ‘‘చతున్నవుతితో కప్పే, యం పుప్ఫమభిరోపయిం;

దుగ్గతిం నాభిజానామి, పుప్ఫదానస్సిదం ఫలం.

౪. ‘‘ఇతో ఛత్తింసకప్పమ్హి, ఏకో ఆసిం మహీపతి;

అన్తలిక్ఖకరో నామ, చక్కవత్తీ మహబ్బలో.

౫. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా ఆకాసుక్ఖిపియో థేరో ఇమా గాథాయో అభాసిత్థాతి.

ఆకాసుక్ఖిపియత్థేరస్సాపదానం పఠమం.

౨. తేలమక్ఖియత్థేరఅపదానం

౬. ‘‘సిద్ధత్థమ్హి భగవతి, నిబ్బుతమ్హి నరాసభే;

బోధియా వేదికాయాహం, తేలం మక్ఖేసి తావదే.

౭. ‘‘చతున్నవుతితో కప్పే, యం తేలం మక్ఖయిం తదా;

దుగ్గతిం నాభిజానామి, మక్ఖనాయ ఇదం ఫలం.

౮. ‘‘చతువీసే ఇతో కప్పే, సుచ్ఛవి నామ ఖత్తియో;

సత్తరతనసమ్పన్నో, చక్కవత్తీ మహబ్బలో.

౯. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా తేలమక్ఖియో థేరో ఇమా గాథాయో అభాసిత్థాతి.

తేలమక్ఖియత్థేరస్సాపదానం దుతియం.

౩. అడ్ఢచన్దియత్థేరఅపదానం

౧౦. ‘‘తిస్సస్స ఖో భగవతో, బోధియా పాదపుత్తమే;

అడ్ఢచన్దం మయా దిన్నం, ధరణీరుహపాదపే.

౧౧. ‘‘ద్వేనవుతే ఇతో కప్పే, యం చన్ద [యం పుప్ఫ (క.)] మభిరోపయిం;

దుగ్గతిం నాభిజానామి, బోధిపూజాయిదం ఫలం.

౧౨. ‘‘పఞ్చవీసే ఇతో కప్పే, దేవలో నామ ఖత్తియో;

సత్తరతనసమ్పన్నో, చక్కవత్తీ మహబ్బలో.

౧౩. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా అడ్ఢచన్దియో థేరో ఇమా గాథాయో అభాసిత్థాతి.

అడ్ఢచన్దియత్థేరస్సాపదానం తతియం.

౪. పదీపదాయకత్థేరఅపదానం

౧౪. ‘‘దేవభూతో అహం సన్తో, ఓరుయ్హ పథవిం తదా;

పదీపే పఞ్చ పాదాసిం, పసన్నో సేహి పాణిభి.

౧౫. ‘‘చతున్నవుతితో కప్పే, యం పదీపమదం తదా;

దుగ్గతిం నాభిజానామి, దీపదానస్సిదం ఫలం.

౧౬. ‘‘పఞ్చపఞ్ఞాసకే కప్పే, ఏకో ఆసిం మహీపతి;

సమన్తచక్ఖునామేన, చక్కవత్తీ మహబ్బలో.

౧౭. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా పదీపదాయకో [అపణ్ణదీపియో (సీ. క.)] థేరో ఇమా గాథాయో అభాసిత్థాతి.

పదీపదాయకత్థేరస్సాపదానం చతుత్థం.

౫. బిళాలిదాయకత్థేరఅపదానం

౧౮. ‘‘హిమవన్తస్సావిదూరే, రోమసో నామ పబ్బతో;

తమ్హి పబ్బతపాదమ్హి, సమణో భావితిన్ద్రియో.

౧౯. ‘‘బిళాలియో గహేత్వాన, సమణస్స అదాసహం;

అనుమోది మహావీరో, సయమ్భూ అపరాజితో.

౨౦. ‘‘బిళాలీ తే మమ దిన్నా, విప్పసన్నేన చేతసా;

భవే నిబ్బత్తమానమ్హి, ఫలం నిబ్బత్తతం తవ.

౨౧. ‘‘చతున్నవుతితో కప్పే, యం బిళాలిమదాసహం;

దుగ్గతిం నాభిజానామి, బిళాలియా ఇదం ఫలం.

౨౨. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా బిళాలిదాయకో థేరో ఇమా గాథాయో అభాసిత్థాతి.

బిళాలిదాయకత్థేరస్సాపదానం పఞ్చమం.

౬. మచ్ఛదాయకత్థేరఅపదానం

౨౩. ‘‘చన్దభాగానదీతీరే, ఉక్కుసో ఆసహం తదా;

మహన్తం మచ్ఛం పగ్గయ్హ, సిద్ధత్థమునినో అదం.

౨౪. ‘‘చతున్నవుతితో కప్పే, యం మచ్ఛమదదిం తదా;

దుగ్గతిం నాభిజానామి, మచ్ఛదానస్సిదం ఫలం.

౨౫. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా మచ్ఛదాయకో థేరో ఇమా గాథాయో అభాసిత్థాతి.

మచ్ఛదాయకత్థేరస్సాపదానం ఛట్ఠం.

౭. జవహంసకత్థేరఅపదానం

౨౬. ‘‘చన్దభాగానదీతీరే, ఆసిం వనచరో తదా;

సిద్ధత్థం అద్దసం బుద్ధం, గచ్ఛన్తం అనిలఞ్జసే.

౨౭. ‘‘అఞ్జలిం పగ్గహేత్వాన, ఉల్లోకేన్తో మహామునిం;

సకం చిత్తం పసాదేత్వా, అవన్దిం నాయకం అహం.

౨౮. ‘‘చతున్నవుతితో కప్పే, యమవన్దిం నరాసభం;

దుగ్గతిం నాభిజానామి, వన్దనాయ ఇదం ఫలం.

౨౯. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా జవహంసకో థేరో ఇమా గాథాయో అభాసిత్థాతి.

జవహంసకత్థేరస్సాపదానం సత్తమం.

౮. సళలపుప్ఫియత్థేరఅపదానం

౩౦. ‘‘చన్దభాగానదీతీరే, అహోసిం కిన్నరో తదా;

విపస్సిం అద్దసం బుద్ధం, రంసిజాలసమాకులం.

౩౧. ‘‘పసన్నచిత్తో సుమనో, పరమాయ చ పీతియా;

పగ్గయ్హ సళలం పుప్ఫం, విపస్సిం ఓకిరిం అహం.

౩౨. ‘‘ఏకనవుతితో కప్పే, యం పుప్ఫమభిపూజయిం;

దుగ్గతిం నాభిజానామి, బుద్ధపూజాయిదం ఫలం.

౩౩. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా సళలపుప్ఫియో థేరో ఇమా గాథాయో అభాసిత్థాతి.

సళలపుప్ఫియత్థేరస్సాపదానం అట్ఠమం.

౯. ఉపాగతాసయత్థేరఅపదానం

౩౪. ‘‘హిమవన్తస్స వేమజ్ఝే, సరో ఆసి సునిమ్మితో;

తత్థాహం రక్ఖసో ఆసిం, హేఠసీలో భయానకో.

౩౫. ‘‘అనుకమ్పకో కారుణికో, విపస్సీ లోకనాయకో;

మముద్ధరితుకామో సో, ఆగచ్ఛి మమ సన్తికం.

౩౬. ‘‘ఉపాగతం మహావీరం, దేవదేవం నరాసభం;

ఆసయా అభినిక్ఖమ్మ, అవన్దిం సత్థునో అహం.

౩౭. ‘‘ఏకనవుతితో కప్పే, యం వన్దిం పురిసుత్తమం;

దుగ్గతిం నాభిజానామి, వన్దనాయ ఇదం ఫలం.

౩౮. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా ఉపాగతాసయో [ఉపాగతహాసనియో (స్యా.), ఉపాగతాహాసనియో (క.)] థేరో ఇమా గాథాయో అభాసిత్థాతి.

ఉపాగతాసయత్థేరస్సాపదానం నవమం.

౧౦. తరణియత్థేరఅపదానం

౩౯. ‘‘సువణ్ణవణ్ణో సమ్బుద్ధో, విపస్సీ దక్ఖిణారహో;

నదీతీరే ఠితో సత్థా, భిక్ఖుసఙ్ఘపురక్ఖతో.

౪౦. ‘‘నావా న విజ్జతే తత్థ, సన్తారణీ మహణ్ణవే;

నదియా అభినిక్ఖమ్మ, తారేసిం లోకనాయకం.

౪౧. ‘‘ఏకనవుతితో కప్పే, యం తారేసిం నరుత్తమం;

దుగ్గతిం నాభిజానామి, తరణాయ ఇదం ఫలం.

౪౨. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా తరణియో థేరో ఇమా గాథాయో అభాసిత్థాతి.

తరణియత్థేరస్సాపదానం దసమం.

పదుముక్ఖిపవగ్గో సత్తవీసతిమో.