౨౬. థోమకవగ్గో

౧. థోమకత్థేరఅపదానం

౧. ‘‘దేవలోకే ఠితో సన్తో, విపస్సిస్స మహేసినో;

ధమ్మం సుణిత్వా ముదితో, ఇమం వాచం అభాసహం.

౨. ‘‘‘నమో తే పురిసాజఞ్ఞ, నమో తే పురిసుత్తమ;

బహుజ్జనం [బహుం జనం (సీ.)] తారయసి, దేసేన్తో అమతం పదం’.

౩. ‘‘ఏకనవుతితో కప్పే, యం వాచమభణిం తదా;

దుగ్గతిం నాభిజానామి, థోమనాయ ఇదం ఫలం.

౪. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా థోమకో థేరో ఇమా గాథాయో అభాసిత్థాతి.

థోమకత్థేరస్సాపదానం పఠమం.

౨. ఏకాసనదాయకత్థేరఅపదానం

౫. ‘‘విజహిత్వా దేవవణ్ణం, సభరియో ఇధాగమిం;

అధికారం కత్తుకామో, బుద్ధసేట్ఠస్స సాసనే.

౬. ‘‘దేవలో నామ నామేన, పదుముత్తరసావకో;

తస్స భిక్ఖా మయా దిన్నా, విప్పసన్నేన చేతసా.

౭. ‘‘సతసహస్సితో కప్పే, యం కమ్మమకరిం తదా;

దుగ్గతిం నాభిజానామి, పిణ్డపాతస్సిదం ఫలం.

౮. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా ఏకాసనదాయకో థేరో ఇమా గాథాయో అభాసిత్థాతి.

ఏకాసనదాయకత్థేరస్సాపదానం దుతియం.

౩. చితకపూజకత్థేరఅపదానం

౯. ‘‘ఆనన్దో నామ సమ్బుద్ధో, సయమ్భూ అపరాజితో;

అరఞ్ఞే పరినిబ్బాయి, అమనుస్సమ్హి కాననే.

౧౦. ‘‘దేవలోకా ఇధాగన్త్వా, చితం కత్వానహం తదా;

సరీరం తత్థ ఝాపేసిం, సక్కారఞ్చ అకాసహం.

౧౧. ‘‘ఏకనవుతితో కప్పే, యం కమ్మమకరిం తదా;

దుగ్గతిం నాభిజానామి, బుద్ధపూజాయిదం ఫలం.

౧౨. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా చితకపూజకో థేరో ఇమా గాథాయో అభాసిత్థాతి.

చితకపూజకత్థేరస్సాపదానం తతియం.

౪. తిచమ్పకపుప్ఫియత్థేరఅపదానం

౧౩. ‘‘హిమవన్తస్సావిదూరే, వికతో [వికనో (సీ. స్యా.)] నామ పబ్బతో;

తస్స వేమజ్ఝే వసతి, సమణో భావితిన్ద్రియో.

౧౪. ‘‘దిస్వాన తస్సోపసమం, విప్పసన్నేన చేతసా;

తీణి చమ్పకపుప్ఫాని, గహేత్వాన సమోకిరిం.

౧౫. ‘‘ఏకనవుతితో కప్పే, యం పుప్ఫమభిపూజయిం;

దుగ్గతిం నాభిజానామి, బుద్ధపూజాయిదం ఫలం.

౧౬. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా తిచమ్పకపుప్ఫియో థేరో ఇమా గాథాయో అభాసిత్థాతి.

తిచమ్పకపుప్ఫియత్థేరస్సాపదానం చతుత్థం.

౫. సత్తపాటలియత్థేరఅపదానం

౧౭. ‘‘కణికారంవ జోతన్తం, నిసిన్నం పబ్బతన్తరే;

సత్త పాటలిపుప్ఫాని, బుద్ధస్స అభిరోపయిం.

౧౮. ‘‘చతున్నవుతితో కప్పే, యం పుప్ఫమభిరోపయిం;

దుగ్గతిం నాభిజానామి, బుద్ధపూజాయిదం ఫలం.

౧౯. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా సత్తపాటలియో థేరో ఇమా గాథాయో అభాసిత్థాతి.

సత్తపాటలియత్థేరస్సాపదానం పఞ్చమం.

౬. ఉపాహనదాయకత్థేరఅపదానం

౨౦. ‘‘అహోసిం చన్దనో నామ, సమ్బుద్ధస్సత్రజో తదా;

ఏకోపాహనో మయా దిన్నో, బోధిం సమ్పజ్జ మే తువం.

౨౧. ‘‘ఏకనవుతితో కప్పే, యం పానధిం [యముపాహనం (సీ.), యం పాదుం (స్యా.)] దదిం తదా;

దుగ్గతిం నాభిజానామి, ఉపాహనస్సిదం ఫలం.

౨౨. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా ఉపాహనదాయకో థేరో ఇమా గాథాయో అభాసిత్థాతి.

ఉపాహనదాయకత్థేరస్సాపదానం ఛట్ఠం.

౭. మఞ్జరిపూజకత్థేరఅపదానం

౨౩. ‘‘మఞ్జరికం కరిత్వాన, రథియం పటిపజ్జహం;

అద్దసం సమణానగ్గం, భిక్ఖుసఙ్ఘపురక్ఖతం.

౨౪. ‘‘పసన్నచిత్తో సుమనో, పరమాయ చ పీతియా;

ఉభో హత్థేహి పగ్గయ్హ, బుద్ధస్స అభిరోపయిం.

౨౫. ‘‘ద్వేనవుతే ఇతో కప్పే, యం పుప్ఫమభిపూజయిం;

దుగ్గతిం నాభిజానామి, పుప్ఫపూజాయిదం ఫలం.

౨౬. ‘‘ఇతో తేసత్తతికప్పే, ఏకో ఆసిం మహీపతి;

జోతియో నామ నామేన, చక్కవత్తీ మహబ్బలో.

౨౭. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా మఞ్జరిపూజకో థేరో ఇమా గాథాయో అభాసిత్థాతి.

మఞ్జరిపూజకత్థేరస్సాపదానం సత్తమం.

౮. పణ్ణదాయకత్థేరఅపదానం

౨౮. ‘‘పబ్బతే హిమవన్తమ్హి, వాకచీరధరో అహం;

అలోణపణ్ణభక్ఖోమ్హి, నియమేసు చ సంవుతో.

౨౯. ‘‘పాతరాసే అనుప్పత్తే, సిద్ధత్థో ఉపగచ్ఛి మం;

తాహం బుద్ధస్స పాదాసిం, పసన్నో సేహి పాణిభి.

౩౦. ‘‘చతున్నవుతితో కప్పే, యం పణ్ణమదదిం తదా;

దుగ్గతిం నాభిజానామి, పణ్ణదానస్సిదం ఫలం.

౩౧. ‘‘సత్తవీసతికప్పమ్హి, రాజా ఆసిం సదత్థియో [యదత్థియో (సీ. స్యా.)];

సత్తరతనసమ్పన్నో, చక్కవత్తీ మహబ్బలో.

౩౨. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా పణ్ణదాయకో థేరో ఇమా గాథాయో అభాసిత్థాతి.

పణ్ణదాయకత్థేరస్సాపదానం అట్ఠమం.

౯. కుటిదాయకత్థేరఅపదానం

౩౩. ‘‘విపినచారీ సమ్బుద్ధో, రుక్ఖమూలే వసీ తదా;

పణ్ణసాలం కరిత్వాన, అదాసిం అపరాజితే.

౩౪. ‘‘ఏకనవుతితో కప్పే, యం పణ్ణకుటికం అదం;

దుగ్గతిం నాభిజానామి, కుటిదానస్సిదం ఫలం.

౩౫. ‘‘అట్ఠవీసే [అట్ఠతింసే (స్యా.)] ఇతో కప్పే, సోళసాసింసు రాజానో;

సబ్బత్థ అభివస్సీతి, వుచ్చరే చక్కవత్తినో.

౩౬. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా కుటిదాయకో థేరో ఇమా గాథాయో అభాసిత్థాతి.

కుటిదాయకత్థేరస్సాపదానం నవమం.

౧౦. అగ్గపుప్ఫియత్థేరఅపదానం

౩౭. ‘‘సువణ్ణవణ్ణం సమ్బుద్ధం, నిసిన్నం పబ్బతన్తరే;

ఓభాసయన్తం రంసేన [రంసియా (స్యా.)], సిఖినం సిఖినం యథా.

౩౮. ‘‘అగ్గజం పుప్ఫమాదాయ, ఉపాగచ్ఛిం నరుత్తమం;

పసన్నచిత్తో సుమనో, బుద్ధస్స అభిరోపయిం.

౩౯. ‘‘ఏకత్తింసే ఇతో కప్పే, యం పుప్ఫమభిపూజయిం;

దుగ్గతిం నాభిజానామి, బుద్ధపూజాయిదం ఫలం.

౪౦. ‘‘పఞ్చవీసతికప్పమ్హి, అహోసి అమితోగతో [అమితవ్హయో (సీ.)];

సత్తరతనసమ్పన్నో, చక్కవత్తీ మహబ్బలో.

౪౧. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా అగ్గపుప్ఫియో థేరో ఇమా గాథాయో అభాసిత్థాతి.

అగ్గపుప్ఫియత్థేరస్సాపదానం దసమం.

థోమకవగ్గో ఛబ్బీసతిమో.