౯. సప్పిదాయకత్థేరఅపదానం

౪౪. ‘‘నిసిన్నో పాసాదవరే, నారీగణపురక్ఖతో;

బ్యాధితం సమణం దిస్వా, అభినామేసహం ఘరం.

౪౫. ‘‘ఉపవిట్ఠం మహావీరం, దేవదేవం నరాసభం;

సప్పితేలం మయా దిన్నం, సిద్ధత్థస్స మహేసినో.

౪౬. ‘‘పస్సద్ధదరథం దిస్వా, విప్పసన్నముఖిన్ద్రియం;

వన్దిత్వా సత్థునో పాదే, అనుసంసావయిం పురే.

౪౭. ‘‘దిస్వా మం సుప్పసన్నత్తం [సుప్పసన్నన్తం (స్యా. క.) సుప్పసన్నచిత్తన్తి అత్థో], ఇద్ధియా పారమిఙ్గతో;

నభం అబ్భుగ్గమీ ధీరో, హంసరాజావ అమ్బరే.

౪౮. ‘‘చతున్నవుతితో కప్పే, యం దానమదదిం తదా;

దుగ్గతిం నాభిజానామి, సప్పితేలస్సిదం ఫలం.

౪౯. ‘‘ఇతో సత్తరసే కప్పే, జుతిదేవ [దుతిదేవ (స్యా.), తుతిదేవ (క.)] సనామకో;

సత్తరతనసమ్పన్నో, చక్కవత్తీ మహబ్బలో.

౫౦. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా సప్పిదాయకో థేరో ఇమా గాథాయో అభాసిత్థాతి.

సప్పిదాయకత్థేరస్సాపదానం నవమం.