౩. సచ్చసఞ్ఞకత్థేరఅపదానం

౧౧. ‘‘వేస్సభూ తమ్హి సమయే, భిక్ఖుసఙ్ఘపురక్ఖతో;

దేసేతి అరియసచ్చాని, నిబ్బాపేన్తో మహాజనం.

౧౨. ‘‘పరమకారుఞ్ఞపత్తోమ్హి, సమితిం అగమాసహం;

సోహం నిసిన్నకో సన్తో, ధమ్మమస్సోసి సత్థునో.

౧౩. ‘‘తస్సాహం ధమ్మం సుత్వాన, దేవలోకం అగచ్ఛహం;

తింసకప్పాని దేవేసు, అవసిం తత్థహం పురే.

౧౪. ‘‘ఏకత్తింసే ఇతో కప్పే, యం సఞ్ఞమలభిం తదా;

దుగ్గతిం నాభిజానామి, సచ్చసఞ్ఞాయిదం ఫలం.

౧౫. ‘‘ఛబ్బీసమ్హి ఇతో కప్పే, ఏకో ఆసిం జనాధిపో;

ఏకఫుసితనామేన, చక్కవత్తీ మహబ్బలో.

౧౬. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా సచ్చసఞ్ఞకో థేరో ఇమా గాథాయో అభాసిత్థాతి.

సచ్చసఞ్ఞకత్థేరస్సాపదానం తతియం.