౧. హత్థిదాయకత్థేరఅపదానం

౧. ‘‘సిద్ధత్థస్స భగవతో, ద్విపదిన్దస్స తాదినో;

నాగసేట్ఠో మయా దిన్నో, ఈసాదన్తో ఉరూళ్హవా.

౨. ‘‘ఉత్తమత్థం అనుభోమి, సన్తిపదమనుత్తరం;

నాగదానం [అగ్గదానం (సీ. క.)] మయా దిన్నం, సబ్బలోకహితేసినో.

౩. ‘‘చతున్నవుతితో కప్పే, యం నాగ [దాన (సీ. క.)] మదదిం తదా;

దుగ్గతిం నాభిజానామి, నాగదానస్సిదం ఫలం.

౪. ‘‘అట్ఠసత్తతికప్పమ్హి, సోళసాసింసు ఖత్తియా;

సమన్తపాసాదికా నామ, చక్కవత్తీ మహబ్బలా.

౫. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా హత్థిదాయకో థేరో ఇమా గాథాయో అభాసిత్థాతి.

హత్థిదాయకత్థేరస్సాపదానం పఠమం.