౧. తమాలపుప్ఫియత్థేరఅపదానం

౧. ‘‘చుల్లాసీతిసహస్సాని, థమ్భా సోవణ్ణయా అహూ;

దేవలట్ఠిపటిభాగం, విమానం మే సునిమ్మితం.

౨. ‘‘తమాలపుప్ఫం పగ్గయ్హ, విప్పసన్నేన చేతసా;

బుద్ధస్స అభిరోపయిం, సిఖినో లోకబన్ధునో.

౩. ‘‘ఏకత్తింసే ఇతో కప్పే, యం కమ్మమకరిం తదా;

దుగ్గతిం నాభిజానామి, బుద్ధపూజాయిదం ఫలం.

౪. ‘‘ఇతో వీసతిమే కప్పే, చన్దతిత్తోతి ఏకకో;

సత్తరతనసమ్పన్నో, చక్కవత్తీ మహబ్బలో.

౫. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా తమాలపుప్ఫియో థేరో ఇమా గాథాయో అభాసిత్థాతి.

తమాలపుప్ఫియత్థేరస్సాపదానం పఠమం.