౯. సోపాకత్థేరఅపదానం

౧౧౨. ‘‘పబ్భారం సోధయన్తస్స [సేవయన్తస్స (సీ. క.)], విపినే పబ్బతుత్తమే;

సిద్ధత్థో నామ భగవా, ఆగచ్ఛి మమ సన్తికం.

౧౧౩. ‘‘బుద్ధం ఉపగతం దిస్వా, లోకజేట్ఠస్స తాదినో;

సన్థరం సన్థరిత్వాన [పఞ్ఞపేత్వాన (స్యా. అట్ఠ)], పుప్ఫాసనమదాసహం.

౧౧౪. ‘‘పుప్ఫాసనే నిసీదిత్వా, సిద్ధత్థో లోకనాయకో;

మమఞ్చ గతిమఞ్ఞాయ, అనిచ్చతముదాహరి.

౧౧౫. ‘‘‘అనిచ్చా వత సఙ్ఖారా, ఉప్పాదవయధమ్మినో;

ఉప్పజ్జిత్వా నిరుజ్ఝన్తి, తేసం వూపసమో సుఖో’.

౧౧౬. ‘‘ఇదం వత్వాన సబ్బఞ్ఞూ, లోకజేట్ఠో నరాసభో;

నభం అబ్భుగ్గమి వీరో, హంసరాజావ అమ్బరే.

౧౧౭. ‘‘సకం దిట్ఠిం జహిత్వాన, భావయానిచ్చసఞ్ఞహం;

ఏకాహం భావయిత్వాన, తత్థ కాలం కతో అహం.

౧౧౮. ‘‘ద్వే సమ్పత్తీ అనుభోత్వా, సుక్కమూలేన చోదితో;

పచ్ఛిమే భవే సమ్పత్తే, సపాకయోనుపాగమిం.

౧౧౯. ‘‘అగారా అభినిక్ఖమ్మ, పబ్బజిం అనగారియం;

జాతియా సత్తవస్సోహం, అరహత్తమపాపుణిం.

౧౨౦. ‘‘ఆరద్ధవీరియో పహితత్తో, సీలేసు సుసమాహితో;

తోసేత్వాన మహానాగం, అలత్థం ఉపసమ్పదం.

౧౨౧. ‘‘చతున్నవుతితో కప్పే, యం కమ్మమకరిం తదా;

దుగ్గతిం నాభిజానామి, పుప్ఫదానస్సిదం ఫలం.

౧౨౨. ‘‘చతున్నవుతితో కప్పే, యం సఞ్ఞం భావయిం తదా;

తం సఞ్ఞం భావయన్తస్స, పత్తో మే ఆసవక్ఖయో.

౧౨౩. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా సోపాకో థేరో ఇమా గాథాయో అభాసిత్థాతి.

సోపాకత్థేరస్సాపదానం నవమం.