౧౦. సుమఙ్గలత్థేరఅపదానం

౧౨౪. ‘‘ఆహుతిం యిట్ఠుకామోహం, పటియాదేత్వాన భోజనం;

బ్రాహ్మణే పటిమానేన్తో, విసాలే మాళకే ఠితో.

౧౨౫. ‘‘అథద్దసాసిం సమ్బుద్ధం, పియదస్సిం మహాయసం;

సబ్బలోకవినేతారం, సయమ్భుం అగ్గపుగ్గలం.

౧౨౬. ‘‘భగవన్తం జుతిమన్తం, సావకేహి పురక్ఖతం;

ఆదిచ్చమివ రోచన్తం, రథియం పటిపన్నకం.

౧౨౭. ‘‘అఞ్జలిం పగ్గహేత్వాన, సకం చిత్తం పసాదయిం;

మనసావ నిమన్తేసిం, ‘ఆగచ్ఛతు మహాముని’.

౧౨౮. ‘‘మమ సఙ్కప్పమఞ్ఞాయ, సత్థా లోకే అనుత్తరో;

ఖీణాసవసహస్సేహి, మమ ద్వారం ఉపాగమి.

౧౨౯. ‘‘నమో తే పురిసాజఞ్ఞ, నమో తే పురిసుత్తమ;

పాసాదం అభిరూహిత్వా, సీహాసనే నిసీదతం [నిసీద త్వం (సీ.)].

౧౩౦. ‘‘దన్తో దన్తపరివారో, తిణ్ణో తారయతం వరో;

పాసాదం అభిరూహిత్వా, నిసీది పవరాసనే.

౧౩౧. ‘‘యం మే అత్థి సకే గేహే, ఆమిసం పచ్చుపట్ఠితం;

తాహం బుద్ధస్స పాదాసిం, పసన్నో సేహి పాణిభి.

౧౩౨. ‘‘పసన్నచిత్తో సుమనో, వేదజాతో కతఞ్జలీ;

బుద్ధసేట్ఠం నమస్సామి, అహో బుద్ధస్సుళారతా.

౧౩౩. ‘‘అట్ఠన్నం పయిరూపాసతం, భుఞ్జం ఖీణాసవా బహూ;

తుయ్హేవేసో ఆనుభావో, సరణం తం ఉపేమహం.

౧౩౪. ‘‘పియదస్సీ చ భగవా, లోకజేట్ఠో నరాసభో;

భిక్ఖుసఙ్ఘే నిసీదిత్వా, ఇమా గాథా అభాసథ.

౧౩౫. ‘‘‘యో సో సఙ్ఘం అభోజేసి, ఉజుభూతం సమాహితం;

తథాగతఞ్చ సమ్బుద్ధం, సుణాథ మమ భాసతో.

౧౩౬. ‘‘‘సత్తవీసతిక్ఖత్తుం సో, దేవరజ్జం కరిస్సతి;

సకకమ్మాభిరద్ధో సో, దేవలోకే రమిస్సతి.

౧౩౭. ‘‘‘దస అట్ఠ చక్ఖత్తుం [దసఞ్చట్ఠక్ఖత్థుం (సీ.), దస చట్ఠక్ఖత్తుం (స్యా.)] సో, చక్కవత్తీ భవిస్సతి;

పథబ్యా రజ్జం పఞ్చసతం, వసుధం ఆవసిస్సతి’.

౧౩౮. ‘‘అరఞ్ఞవనమోగ్గయ్హ, కాననం బ్యగ్ఘసేవితం;

పధానం పదహిత్వాన, కిలేసా ఝాపితా మయా.

౧౩౯. ‘‘అట్ఠారసే కప్పసతే, యం దానమదదిం తదా;

దుగ్గతిం నాభిజానామి, భత్తదానస్సిదం ఫలం.

౧౪౦. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా సుమఙ్గలో థేరో ఇమా గాథాయో అభాసిత్థాతి.

సుమఙ్గలత్థేరస్సాపదానం దసమం.

తస్సుద్దానం –

సీహాసనీ ఏకథమ్భీ, నన్దో చ చూళపన్థకో;

పిలిన్దరాహులో చేవ, వఙ్గన్తో రట్ఠపాలకో.

సోపాకో మఙ్గలో చేవ, దసేవ దుతియే వగ్గే;

సతఞ్చ అట్ఠతింస చ, గాథా చేత్థ పకాసితా.

సీహాసనియవగ్గో దుతియో.