౧. ఆలమ్బణదాయకత్థేరఅపదానం

౧. ‘‘అత్థదస్సిస్స భగవతో, లోకజేట్ఠస్స తాదినో;

ఆలమ్బణం మయా దిన్నం, ద్విపదిన్దస్స తాదినో.

౨. ‘‘ధరణిం పటిపజ్జామి, విపులం సాగరప్పరం;

పాణేసు చ ఇస్సరియం, వత్తేమి వసుధాయ చ.

౩. ‘‘కిలేసా ఝాపితా మయ్హం, భవా సబ్బే సమూహతా;

తిస్సో విజ్జా అనుప్పత్తా, కతం బుద్ధస్స సాసనం.

౪. ‘‘ఇతో ద్వేసట్ఠికప్పమ్హి, తయో ఆసింసు ఖత్తియా;

ఏకాపస్సితనామా తే, చక్కవత్తీ మహబ్బలా.

౫. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా ఆలమ్బణదాయకో థేరో ఇమా గాథాయో అభాసిత్థాతి.

ఆలమ్బణదాయకత్థేరస్సాపదానం పఠమం.