౨. అజినదాయకత్థేరఅపదానం

౬. ‘‘ఏకత్తింసే ఇతో కప్పే, గణసత్థారకో అహం;

అద్దసం విరజం బుద్ధం, ఆహుతీనం పటిగ్గహం.

౭. ‘‘చమ్మఖణ్డం మయా దిన్నం, సిఖినో లోకబన్ధునో;

తేన కమ్మేన ద్విపదిన్ద, లోకజేట్ఠ నరాసభ.

౮. ‘‘సమ్పత్తిం అనుభోత్వాన, కిలేసే ఝాపయిం అహం;

ధారేమి అన్తిమం దేహం, సమ్మాసమ్బుద్ధసాసనే.

౯. ‘‘ఏకత్తింసే ఇతో కప్పే, అజినం యం అదాసహం;

దుగ్గతిం నాభిజానామి, అజినస్స ఇదం ఫలం.

౧౦. ‘‘ఇతో పఞ్చమకే కప్పే, రాజా ఆసిం సుదాయకో;

సత్తరతనసమ్పన్నో, చక్కవత్తీ మహబ్బలో.

౧౧. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా అజినదాయకో థేరో ఇమా గాథాయో అభాసిత్థాతి.

అజినదాయకత్థేరస్సాపదానం దుతియం.