౩. ద్వేరతనియత్థేరఅపదానం

౧౨. ‘‘మిగలుద్దో పురే ఆసిం, అరఞ్ఞే కాననే అహం;

అద్దసం విరజం బుద్ధం, ఆహుతీనం పటిగ్గహం.

౧౩. ‘‘మంసపేసి మయా దిన్నా, విపస్సిస్స మహేసినో;

సదేవకస్మిం లోకస్మిం, ఇస్సరం కారయామహం.

౧౪. ‘‘ఇమినా మంసదానేన, రతనం నిబ్బత్తతే మమ;

దువేమే రతనా లోకే, దిట్ఠధమ్మస్స పత్తియా.

౧౫. ‘‘తేహం సబ్బే అనుభోమి, మంసదానస్స సత్తియా;

గత్తఞ్చ ముదుకం మయ్హం, పఞ్ఞా నిపుణవేదనీ.

౧౬. ‘‘ఏకనవుతితో కప్పే, యం మంసమదదిం తదా;

దుగ్గతిం నాభిజానామి, మంసదానస్సిదం ఫలం.

౧౭. ‘‘ఇతో చతుత్థకే కప్పే, ఏకో ఆసిం జనాధిపో;

మహారోహితనామో సో, చక్కవత్తీ మహబ్బలో.

౧౮. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా ద్వేరతనియో [ద్విరతనియో (సీ.)] థేరో ఇమా గాథాయో అభాసిత్థాతి.

ద్వేరతనియత్థేరస్సాపదానం తతియం.

దసమం భాణవారం.