౮. రట్ఠపాలత్థేరఅపదానం

౯౭. ‘‘పదుముత్తరస్స భగవతో, లోకజేట్ఠస్స తాదినో;

వరనాగో మయా దిన్నో, ఈసాదన్తో ఉరూళ్హవా.

౯౮. ‘‘సేతచ్ఛత్తో పసోభితో, సకప్పనో సహత్థిపో;

అగ్ఘాపేత్వాన తం సబ్బం, సఙ్ఘారామం అకారయిం.

౯౯. ‘‘చతుపఞ్ఞాససహస్సాని, పాసాదే కారయిం అహం;

మహోఘదానం [మహాభత్తం (సీ.), మహోఘఞ్చ (క.), మహాదానం (?)] కరిత్వాన, నియ్యాదేసిం మహేసినో.

౧౦౦. ‘‘అనుమోది మహావీరో, సయమ్భూ అగ్గపుగ్గలో;

సబ్బే జనే హాసయన్తో, దేసేసి అమతం పదం.

౧౦౧. ‘‘తం మే బుద్ధో వియాకాసి, జలజుత్తరనామకో;

భిక్ఖుసఙ్ఘే నిసీదిత్వా, ఇమా గాథా అభాసథ.

౧౦౨. ‘‘‘చతుపఞ్ఞాససహస్సాని, పాసాదే కారయీ అయం;

కథయిస్సామి విపాకం, సుణోథ మమ భాసతో.

౧౦౩. ‘‘‘అట్ఠారససహస్సాని, కూటాగారా భవిస్సరే;

బ్యమ్హుత్తమమ్హి నిబ్బత్తా, సబ్బసోణ్ణమయా చ తే.

౧౦౪. ‘‘‘పఞ్ఞాసక్ఖత్తుం దేవిన్దో, దేవరజ్జం కరిస్సతి;

అట్ఠపఞ్ఞాసక్ఖత్తుఞ్చ, చక్కవత్తీ భవిస్సతి.

౧౦౫. ‘‘‘కప్పసతసహస్సమ్హి, ఓక్కాకకులసమ్భవో;

గోతమో నామ గోత్తేన, సత్థా లోకే భవిస్సతి.

౧౦౬. ‘‘‘దేవలోకా చవిత్వాన, సుక్కమూలేన చోదితో;

అడ్ఢే కులే మహాభోగే, నిబ్బత్తిస్సతి తావదే.

౧౦౭. ‘‘‘సో పచ్ఛా పబ్బజిత్వాన, సుక్కమూలేన చోదితో;

రట్ఠపాలోతి నామేన, హేస్సతి సత్థు సావకో.

౧౦౮. ‘‘‘పధానపహితత్తో సో, ఉపసన్తో నిరూపధి;

సబ్బాసవే పరిఞ్ఞాయ, నిబ్బాయిస్సతినాసవో’.

౧౦౯. ‘‘ఉట్ఠాయ అభినిక్ఖమ్మ, జహితా భోగసమ్పదా;

ఖేళపిణ్డేవ భోగమ్హి, పేమం మయ్హం న విజ్జతి.

౧౧౦. ‘‘వీరియం మే ధురధోరయ్హం, యోగక్ఖేమాధివాహనం;

ధారేమి అన్తిమం దేహం, సమ్మాసమ్బుద్ధసాసనే.

౧౧౧. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా రట్ఠపాలో థేరో ఇమా గాథాయో అభాసిత్థాతి.

రట్ఠపాలత్థేరస్సాపదానం అట్ఠమం.