౫. పిలిన్దవచ్ఛత్థేరఅపదానం

౫౫. ‘‘నిబ్బుతే లోకనాథమ్హి, సుమేధే అగ్గపుగ్గలే;

పసన్నచిత్తో సుమనో, థూపపూజం అకాసహం.

౫౬. ‘‘యే చ ఖీణాసవా తత్థ, ఛళభిఞ్ఞా మహిద్ధికా;

తేహం తత్థ సమానేత్వా, సఙ్ఘభత్తం అకాసహం.

౫౭. ‘‘సుమేధస్స భగవతో, ఉపట్ఠాకో తదా అహు;

సుమేధో నామ నామేన, అనుమోదిత్థ సో తదా.

౫౮. ‘‘తేన చిత్తప్పసాదేన, విమానం ఉపపజ్జహం;

ఛళాసీతిసహస్సాని, అచ్ఛరాయో రమింసు మే.

౫౯. ‘‘మమేవ అనువత్తన్తి, సబ్బకామేహి తా సదా;

అఞ్ఞే దేవే అభిభోమి, పుఞ్ఞకమ్మస్సిదం ఫలం.

౬౦. ‘‘పఞ్చవీసతికప్పమ్హి, వరుణో నామ ఖత్తియో;

విసుద్ధభోజనో [సుసుద్ధభోజనో (సీ.)] ఆసిం, చక్కవత్తీ అహం తదా.

౬౧. ‘‘న తే బీజం పవపన్తి, నపి నీయన్తి నఙ్గలా;

అకట్ఠపాకిమం సాలిం, పరిభుఞ్జన్తి మానుసా.

౬౨. ‘‘తత్థ రజ్జం కరిత్వాన, దేవత్తం పున గచ్ఛహం;

తదాపి ఏదిసా మయ్హం, నిబ్బత్తా భోగసమ్పదా.

౬౩. ‘‘న మం మిత్తా అమిత్తా వా, హింసన్తి సబ్బపాణినో;

సబ్బేసమ్పి పియో హోమి, పుఞ్ఞకమ్మస్సిదం ఫలం.

౬౪. ‘‘తింసకప్పసహస్సమ్హి, యం దానమదదిం తదా;

దుగ్గతిం నాభిజానామి, గన్ధాలేపస్సిదం ఫలం.

౬౫. ‘‘ఇమస్మిం భద్దకే కప్పే, ఏకో ఆసిం జనాధిపో;

మహానుభావో రాజాహం [రాజీసి (స్యా. క.)], చక్కవత్తీ మహబ్బలో.

౬౬. ‘‘సోహం పఞ్చసు సీలేసు, ఠపేత్వా జనతం బహుం;

పాపేత్వా సుగతింయేవ, దేవతానం పియో అహుం.

౬౭. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా పిలిన్దవచ్ఛో [పిలిన్దివచ్ఛో (సీ.)] థేరో ఇమా గాథాయో అభాసిత్థాతి.

పిలిన్దవచ్ఛత్థేరస్సాపదానం పఞ్చమం.