౬. రాహులత్థేరఅపదానం

౬౮. ‘‘పదుముత్తరస్స భగవతో, లోకజేట్ఠస్స తాదినో;

సత్తభూమమ్హి పాసాదే, ఆదాసం సన్థరిం అహం.

౬౯. ‘‘ఖీణాసవసహస్సేహి, పరికిణ్ణో మహాముని;

ఉపాగమి గన్ధకుటిం, ద్విపదిన్దో [దిపదిన్దో (సీ. స్యా.)] నరాసభో.

౭౦. ‘‘విరోచేన్తో [విరోచయం (స్యా.)] గన్ధకుటిం, దేవదేవో నరాసభో;

భిక్ఖుసఙ్ఘే ఠితో సత్థా, ఇమా గాథా అభాసథ.

౭౧. ‘‘‘యేనాయం జోతితా సేయ్యా, ఆదాసోవ సుసన్థతో;

తమహం కిత్తయిస్సామి, సుణాథ మమ భాసతో.

౭౨. ‘‘‘సోణ్ణమయా రూపిమయా, అథో వేళురియామయా;

నిబ్బత్తిస్సన్తి పాసాదా, యే కేచి మనసో పియా.

౭౩. ‘‘‘చతుసట్ఠిక్ఖత్తుం దేవిన్దో, దేవరజ్జం కరిస్సతి;

సహస్సక్ఖత్తుం చక్కవత్తీ, భవిస్సతి అనన్తరా.

౭౪. ‘‘‘ఏకవీసతికప్పమ్హి, విమలో నామ ఖత్తియో;

చాతురన్తో విజితావీ, చక్కవత్తీ భవిస్సతి.

౭౫. ‘‘‘నగరం రేణువతీ నామ, ఇట్ఠకాహి సుమాపితం;

ఆయామతో తీణి సతం, చతురస్ససమాయుతం.

౭౬. ‘‘‘సుదస్సనో నామ పాసాదో, విస్సకమ్మేన మాపితో [విసుకమ్మేన§మాపితో (క.), విస్సకమ్మేన నిమ్మితో (సీ.)];

కూటాగారవరూపేతో, సత్తరతనభూసితో.

౭౭. ‘‘‘దససద్దావివిత్తం తం [అవివిత్తం (సీ.)], విజ్జాధరసమాకులం;

సుదస్సనంవ నగరం, దేవతానం భవిస్సతి.

౭౮. ‘‘‘పభా నిగ్గచ్ఛతే తస్స, ఉగ్గచ్ఛన్తేవ సూరియే;

విరోచేస్సతి తం నిచ్చం, సమన్తా అట్ఠయోజనం.

౭౯. ‘‘‘కప్పసతసహస్సమ్హి, ఓక్కాకకులసమ్భవో;

గోతమో నామ గోత్తేన, సత్థా లోకే భవిస్సతి.

౮౦. ‘‘‘తుసితా సో చవిత్వాన, సుక్కమూలేన చోదితో;

గోతమస్స భగవతో, అత్రజో సో భవిస్సతి.

౮౧. ‘‘‘సచే వసేయ్య [సచా’వసేయ్య (?)] అగారం, చక్కవత్తీ భవేయ్య సో;

అట్ఠానమేతం యం తాదీ, అగారే రతిమజ్ఝగా.

౮౨. ‘‘‘నిక్ఖమిత్వా అగారమ్హా, పబ్బజిస్సతి సుబ్బతో;

రాహులో నామ నామేన, అరహా సో భవిస్సతి’.

౮౩. ‘‘కికీవ అణ్డం రక్ఖేయ్య, చామరీ వియ వాలధిం;

నిపకో సీలసమ్పన్నో, మమం రక్ఖి మహాముని [ఏవం రక్ఖిం మహాముని (సీ. క.), మమం దక్ఖి మహాముని (స్యా.)].

౮౪. ‘‘తస్సాహం ధమ్మమఞ్ఞాయ, విహాసిం సాసనే రతో;

సబ్బాసవే పరిఞ్ఞాయ, విహరామి అనాసవో.

౮౫. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా రాహులో థేరో ఇమా గాథాయో అభాసిత్థాతి.

రాహులత్థేరస్సాపదానం ఛట్ఠం.