౪. చూళపన్థకత్థేరఅపదానం

౩౫. ‘‘పదుముత్తరో నామ జినో, ఆహుతీనం పటిగ్గహో;

గణమ్హా వూపకట్ఠో సో, హిమవన్తే వసీ తదా.

౩౬. ‘‘అహమ్పి హిమవన్తమ్హి, వసామి అస్సమే తదా;

అచిరాగతం మహావీరం, ఉపేసిం లోకనాయకం.

౩౭. ‘‘పుప్ఫచ్ఛత్తం గహేత్వాన, ఉపగచ్ఛిం నరాసభం;

సమాధిం సమాపజ్జన్తం, అన్తరాయమకాసహం.

౩౮. ‘‘ఉభో హత్థేహి పగ్గయ్హ, పుప్ఫచ్ఛత్తం అదాసహం;

పటిగ్గహేసి భగవా, పదుముత్తరో మహాముని.

౩౯. ‘‘సబ్బే దేవా అత్తమనా, హిమవన్తం ఉపేన్తి తే;

సాధుకారం పవత్తేసుం, అనుమోదిస్సతి చక్ఖుమా.

౪౦. ‘‘ఇదం వత్వాన తే దేవా, ఉపగచ్ఛుం నరుత్తమం;

ఆకాసే ధారయన్తస్స [ధారయన్తం మే (క), ధారయతో మే (?)], పదుమచ్ఛత్తముత్తమం.

౪౧. ‘‘సతపత్తఛత్తం పగ్గయ్హ, అదాసి తాపసో మమ;

‘తమహం కిత్తయిస్సామి, సుణాథ మమ భాసతో.

౪౨. ‘‘‘పఞ్చవీసతికప్పాని, దేవరజ్జం కరిస్సతి;

చతుత్తింసతిక్ఖత్తుఞ్చ, చక్కవత్తీ భవిస్సతి.

౪౩. ‘‘‘యం యం యోనిం సంసరతి, దేవత్తం అథ మానుసం;

అబ్భోకాసే పతిట్ఠన్తం, పదుమం ధారయిస్సతి’.

౪౪. ‘‘కప్పసతసహస్సమ్హి, ఓక్కాకకులసమ్భవో;

గోతమో నామ గోత్తేన [నామేన (సీ. క.)], సత్థా లోకే భవిస్సతి.

౪౫. ‘‘‘పకాసితే పావచనే, మనుస్సత్తం లభిస్సతి;

మనోమయమ్హి కాయమ్హి, ఉత్తమో సో భవిస్సతి.

౪౬. ‘‘‘ద్వే భాతరో భవిస్సన్తి, ఉభోపి పన్థకవ్హయా;

అనుభోత్వా ఉత్తమత్థం, జోతయిస్సన్తి సాసనం’.

౪౭. ‘‘సోహం అట్ఠారసవస్సో [సో అట్ఠారసవస్సోహం (స్యా.)], పబ్బజిం అనగారియం;

విసేసాహం న విన్దామి, సక్యపుత్తస్స సాసనే.

౪౮. ‘‘దన్ధా మయ్హం గతీ ఆసి, పరిభూతో పురే అహుం [అహం (స్యా.)];

భాతా చ మం పణామేసి, గచ్ఛ దాని సకం ఘరం.

౪౯. ‘‘సోహం పణామితో సన్తో, సఙ్ఘారామస్స కోట్ఠకే;

దుమ్మనో తత్థ అట్ఠాసిం, సామఞ్ఞస్మిం అపేక్ఖవా.

౫౦. ‘‘భగవా తత్థ [అథేత్థ సత్థా (సీ. స్యా.)] ఆగచ్ఛి, సీసం మయ్హం పరామసి;

బాహాయ మం గహేత్వాన, సఙ్ఘారామం పవేసయి.

౫౧. ‘‘అనుకమ్పాయ మే సత్థా, అదాసి పాదపుఞ్ఛనిం;

ఏవం సుద్ధం అధిట్ఠేహి, ఏకమన్తమధిట్ఠహం.

౫౨. ‘‘హత్థేహి తమహం గయ్హ, సరిం కోకనదం అహం;

తత్థ చిత్తం విముచ్చి మే, అరహత్తం అపాపుణిం.

౫౩. ‘‘మనోమయేసు కాయేసు, సబ్బత్థ పారమిం గతో;

సబ్బాసవే పరిఞ్ఞాయ, విహరామి అనాసవో.

౫౪. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా చూళపన్థకో [చుల్లపన్థకో (సీ. స్యా.)] థేరో ఇమా గాథాయో అభాసిత్థాతి.

చూళపన్థకత్థేరస్సాపదానం చతుత్థం.