౩. నన్దత్థేరఅపదానం

౨౭. ‘‘పదుముత్తరస్స భగవతో, లోకజేట్ఠస్స తాదినో;

వత్థం ఖోమం మయా దిన్నం, సయమ్భుస్స మహేసినో.

౨౮. ‘‘తం మే బుద్ధో వియాకాసి, జలజుత్తరనామకో;

‘ఇమినా వత్థదానేన, హేమవణ్ణో భవిస్ససి.

౨౯. ‘‘‘ద్వే సమ్పత్తీ అనుభోత్వా, కుసలమూలేహి చోదితో;

గోతమస్స భగవతో, కనిట్ఠో త్వం భవిస్ససి.

౩౦. ‘‘‘రాగరత్తో సుఖసీలో, కామేసు గేధమాయుతో;

బుద్ధేన చోదితో సన్తో, తదా [తతో (స్యా.)] త్వం పబ్బజిస్ససి.

౩౧. ‘‘‘పబ్బజిత్వాన త్వం తత్థ, కుసలమూలేన చోదితో;

సబ్బాసవే పరిఞ్ఞాయ, నిబ్బాయిస్ససినాసవో’.

౩౨. ‘‘సత్త [సత (స్యా.)] కప్పసహస్సమ్హి, చతురో చేళనామకా;

సట్ఠి కప్పసహస్సమ్హి, ఉపచేలా చతుజ్జనా.

౩౩. ‘‘పఞ్చ కప్పసహస్సమ్హి, చేళావ చతురో జనా;

సత్తరతనసమ్పన్నా, చతుదీపమ్హి ఇస్సరా.

౩౪. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా నన్దో థేరో ఇమా గాథాయో అభాసిత్థాతి.

నన్దత్థేరస్సాపదానం తతియం.