౬. కదమ్బపుప్ఫియత్థేరఅపదానం

౩౦. ‘‘హిమవన్తస్సావిదూరే, కుక్కుటో నామ పబ్బతో;

తమ్హి పబ్బతపాదమ్హి, సత్త బుద్ధా వసన్తి తే.

౩౧. ‘‘కదమ్బం పుప్ఫితం దిస్వా, దీపరాజంవ ఉగ్గతం;

ఉభో హత్థేహి పగ్గయ్హ, సత్త బుద్ధే సమోకిరిం.

౩౨. ‘‘చతున్నవుతితో కప్పే, యం పుప్ఫమభిరోపయిం;

దుగ్గతిం నాభిజానామి, బుద్ధపూజాయిదం ఫలం.

౩౩. ‘‘ద్వేనవుతే ఇతో కప్పే, సత్తాసుం పుప్ఫనామకా;

సత్తరతనసమ్పన్నా, చక్కవత్తీ మహబ్బలా.

౩౪. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా కదమ్బపుప్ఫియో థేరో ఇమా గాథాయో అభాసిత్థాతి;

కదమ్బపుప్ఫియత్థేరస్సాపదానం ఛట్ఠం.