౧. బన్ధుజీవకత్థేరఅపదానం

౧. ‘‘చన్దంవ విమలం సుద్ధం, విప్పసన్నమనావిలం;

నన్దీభవపరిక్ఖీణం, తిణ్ణం లోకే విసత్తికం.

౨. ‘‘నిబ్బాపయన్తం జనతం, తిణ్ణం [దిస్వా (?)] తారయతం వరం [తారయతం మునిం (స్యా.)];

మునిం వనమ్హి ఝాయన్తం [వనస్మిం ఝాయమానం తం (సీ. స్యా.)], ఏకగ్గం సుసమాహితం.

౩. ‘‘బన్ధుజీవకపుప్ఫాని, లగేత్వా సుత్తకేనహం;

బుద్ధస్స అభిరోపయిం, సిఖినో లోకబన్ధునో.

౪. ‘‘ఏకత్తింసే ఇతో కప్పే, యం కమ్మమకరిం తదా;

దుగ్గతిం నాభిజానామి, బుద్ధపూజాయిదం ఫలం.

౫. ‘‘ఇతో సత్తమకే కప్పే, మనుజిన్దో మహాయసో;

సమన్తచక్ఖు నామాసి, చక్కవత్తీ మహబ్బలో.

౬. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా బన్ధుజీవకో థేరో ఇమా గాథాయో అభాసిత్థాతి.

బన్ధుజీవకత్థేరస్సాపదానం పఠమం.