౬. అనులేపదాయకత్థేరఅపదానం

౨౬. ‘‘అనోమదస్సీమునినో, బోధివేదిమకాసహం;

సుధాయ పిణ్డం దత్వాన, పాణికమ్మం అకాసహం.

౨౭. ‘‘దిస్వా తం సుకతం కమ్మం, అనోమదస్సీ నరుత్తమో;

భిక్ఖుసఙ్ఘే ఠితో సత్థా, ఇమం గాథం అభాసథ.

౨౮. ‘‘‘ఇమినా సుధకమ్మేన, చేతనాపణిధీహి చ;

సమ్పత్తిం అనుభోత్వాన, దుక్ఖస్సన్తం కరిస్సతి’.

౨౯. ‘‘పసన్నముఖవణ్ణోమ్హి, ఏకగ్గో సుసమాహితో;

ధారేమి అన్తిమం దేహం, సమ్మాసమ్బుద్ధసాసనే.

౩౦. ‘‘ఇతో కప్పసతే ఆసిం, పరిపుణ్ణే అనూనకే [పరిపుణ్ణో అనూనకో (స్యా.)];

రాజా సబ్బఘనో నామ, చక్కవత్తీ మహబ్బలో.

౩౧. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా అనులేపదాయకో థేరో ఇమా గాథాయో అభాసిత్థాతి.

అనులేపదాయకత్థేరస్సాపదానం ఛట్ఠం.