౯. గణ్ఠిపుప్ఫియత్థేరఅపదానం

౯౧. ‘‘సువణ్ణవణ్ణో సమ్బుద్ధో, విపస్సీ దక్ఖిణారహో;

పురక్ఖతో సావకేహి, ఆరామా అభినిక్ఖమి.

౯౨. ‘‘దిస్వానహం బుద్ధసేట్ఠం, సబ్బఞ్ఞుం తమనాసకం;

పసన్నచిత్తో సుమనో, గణ్ఠిపుప్ఫం [గతమగ్గం (స్యా. క.)] అపూజయిం.

౯౩. ‘‘తేన చిత్తప్పసాదేన, ద్విపదిన్దస్స తాదినో;

హట్ఠో హట్ఠేన చిత్తేన, పున వన్దిం తథాగతం.

౯౪. ‘‘ఏకనవుతితో కప్పే, యం పుప్ఫమభిరోపయిం;

దుగ్గతిం నాభిజానామి, బుద్ధపూజాయిదం ఫలం.

౯౫. ‘‘ఏకతాలీసితో కప్పే, చరణో నామ ఖత్తియో;

సత్తరతనసమ్పన్నో, చక్కవత్తీ మహబ్బలో.

౯౬. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా గణ్ఠిపుప్ఫియో [గన్ధపుప్ఫియో (స్యా. క.)] థేరో ఇమా గాథాయో అభాసిత్థాతి.

గణ్ఠిపుప్ఫియత్థేరస్సాపదానం నవమం.