౧౦. పదుమపూజకత్థేరఅపదానం

౯౭. ‘‘హిమవన్తస్సావిదూరే, గోతమో నామ పబ్బతో;

నానారుక్ఖేహి సఞ్ఛన్నో, మహాభూతగణాలయో.

౯౮. ‘‘వేమజ్ఝమ్హి చ తస్సాసి, అస్సమో అభినిమ్మితో;

పురక్ఖతో ససిస్సేహి, వసామి అస్సమే అహం.

౯౯. ‘‘ఆయన్తు మే సిస్సగణా, పదుమం ఆహరన్తు మే;

బుద్ధపూజం కరిస్సామి, ద్విపదిన్దస్స తాదినో.

౧౦౦. ‘‘ఏవన్తి తే పటిస్సుత్వా, పదుమం ఆహరింసు మే;

తథా నిమిత్తం కత్వాహం, బుద్ధస్స అభిరోపయిం.

౧౦౧. ‘‘సిస్సే తదా సమానేత్వా, సాధుకం అనుసాసహం;

మా ఖో తుమ్హే పమజ్జిత్థ, అప్పమాదో సుఖావహో.

౧౦౨. ‘‘ఏవం సమనుసాసిత్వా, తే సిస్సే వచనక్ఖమే;

అప్పమాదగుణే యుత్తో, తదా కాలఙ్కతో అహం.

౧౦౩. ‘‘ఏకనవుతితో కప్పే, యం పుప్ఫమభిరోపయిం;

దుగ్గతిం నాభిజానామి, బుద్ధపూజాయిదం ఫలం.

౧౦౪. ‘‘ఏకపఞ్ఞాసకప్పమ్హి, రాజా ఆసిం జలుత్తమో;

సత్తరతనసమ్పన్నో, చక్కవత్తీ మహబ్బలో.

౧౦౫. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా పదుమపూజకో థేరో ఇమా గాథాయో అభాసిత్థాతి;

పదుమపూజకత్థేరస్సాపదానం దసమం.

సేరేయ్యవగ్గో తేరసమో.