౮. ఞాణసఞ్ఞికత్థేరఅపదానం

౮౪. ‘‘పబ్బతే హిమవన్తమ్హి, వసామి పబ్బతన్తరే;

పులినం సోభనం దిస్వా, బుద్ధసేట్ఠం అనుస్సరిం.

౮౫. ‘‘ఞాణే ఉపనిధా నత్థి, సఙ్ఖారం [సఙ్గామం (సీ. స్యా.), సఙ్ఖాతం (థేరగాథా అట్ఠ.)] నత్థి సత్థునో;

సబ్బధమ్మం అభిఞ్ఞాయ, ఞాణేన అధిముచ్చతి.

౮౬. ‘‘నమో తే పురిసాజఞ్ఞ, నమో తే పురిసుత్తమ;

ఞాణేన తే సమో నత్థి, యావతా ఞాణముత్తమం.

౮౭. ‘‘ఞాణే చిత్తం పసాదేత్వా, కప్పం సగ్గమ్హి మోదహం;

అవసేసేసు కప్పేసు, కుసలం చరితం [కరితం (సీ. స్యా.), కిరియం (క.)] మయా.

౮౮. ‘‘ఏకనవుతితో కప్పే, యం సఞ్ఞమలభిం తదా;

దుగ్గతిం నాభిజానామి, ఞాణసఞ్ఞాయిదం ఫలం.

౮౯. ‘‘ఇతో సత్తతికప్పమ్హి [తేసత్తతికప్పే (సీ. స్యా.)], ఏకో పులినపుప్ఫియో;

సత్తరతనసమ్పన్నో, చక్కవత్తీ మహబ్బలో.

౯౦. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా ఞాణసఞ్ఞికో థేరో ఇమా గాథాయో అభాసిత్థాతి.

ఞాణసఞ్ఞికత్థేరస్సాపదానం అట్ఠమం.