౭. ఫలదాయకత్థేరఅపదానం

౭౫. ‘‘అజ్ఝాయకో మన్తధరో, తిణ్ణం వేదాన పారగూ;

హిమవన్తస్సావిదూరే, వసామి అస్సమే అహం.

౭౬. ‘‘అగ్గిహుత్తఞ్చ మే అత్థి, పుణ్డరీకఫలాని చ;

పుటకే నిక్ఖిపిత్వాన, దుమగ్గే లగ్గితం మయా.

౭౭. ‘‘పదుముత్తరో లోకవిదూ, ఆహుతీనం పటిగ్గహో;

మముద్ధరితుకామో సో, భిక్ఖన్తో మముపాగమి.

౭౮. ‘‘పసన్నచిత్తో సుమనో, ఫలం బుద్ధస్సదాసహం;

విత్తిసఞ్జననో మయ్హం, దిట్ఠధమ్మసుఖావహో.

౭౯. ‘‘సువణ్ణవణ్ణో సమ్బుద్ధో, ఆహుతీనం పటిగ్గహో;

అన్తలిక్ఖే ఠితో సత్థా, ఇమం గాథం అభాసథ.

౮౦. ‘‘‘ఇమినా ఫలదానేన, చేతనాపణిధీహి చ;

కప్పానం సతసహస్సం, దుగ్గతిం నుపపజ్జసి’.

౮౧. ‘‘తేనేవ సుక్కమూలేన, అనుభోత్వాన సమ్పదా;

పత్తోమ్హి అచలం ఠానం, హిత్వా జయపరాజయం.

౮౨. ‘‘ఇతో సత్తసతే కప్పే, రాజా ఆసిం సుమఙ్గలో;

సత్తరతనసమ్పన్నో చక్కవత్తీ మహబ్బలో.

౮౩. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా ఫలదాయకో థేరో ఇమా గాథాయో అభాసిత్థాతి.

ఫలదాయకత్థేరస్సాపదానం సత్తమం.