౨. పుప్ఫథూపియత్థేరఅపదానం

౧౦. ‘‘హిమవన్తస్సావిదూరే, కుక్కురో నామ [కుక్కుటో నామ (సీ.)] పబ్బతో;

వేమజ్ఝే తస్స వసతి, బ్రాహ్మణో మన్తపారగూ.

౧౧. ‘‘పఞ్చ సిస్ససహస్సాని, పరివారేన్తి మం సదా;

పుబ్బుట్ఠాయీ చ తే ఆసుం, మన్తేసు చ విసారదా.

౧౨. ‘‘బుద్ధో లోకే సముప్పన్నో, తం విజానాథ నో భవం;

అసీతిబ్యఞ్జనానస్స, బాత్తింసవరలక్ఖణా.

౧౩. ‘‘బ్యామప్పభో జినవరో, ఆదిచ్చోవ విరోచతి;

సిస్సానం వచనం సుత్వా, బ్రాహ్మణో మన్తపారగూ.

౧౪. ‘‘అస్సమా అభినిక్ఖమ్మ, దిసం పుచ్ఛతి సిస్సకే [బ్రాహ్మణో (స్యా.)];

యమ్హి దేసే మహావీరో, వసతి లోకనాయకో.

౧౫. ‘‘తాహం దిసం నమస్సిస్సం, జినం అప్పటిపుగ్గలం;

ఉదగ్గచిత్తో సుమనో, పూజేసిం తం తథాగతం.

౧౬. ‘‘ఏథ సిస్సా గమిస్సామ, దక్ఖిస్సామ తథాగతం;

వన్దిత్వా సత్థునో పాదే, సోస్సామ జినసాసనం.

౧౭. ‘‘ఏకాహం అభినిక్ఖమ్మ, బ్యాధిం పటిలభిం అహం;

బ్యాధినా పీళితో సన్తో, సాలం వాసయితుం గమిం.

౧౮. ‘‘సబ్బే సిస్సే సమానేత్వా, అపుచ్ఛిం తే తథాగతం;

కీదిసం లోకనాథస్స, గుణం పరమబుద్ధినో.

౧౯. ‘‘తే మే పుట్ఠా వియాకంసు, యథా దస్సావినో తథా;

సక్కచ్చం బుద్ధసేట్ఠం తం, దేసేసుం [దస్సేసుం (సీ. స్యా.)] మమ సమ్ముఖా.

౨౦. ‘‘తేసాహం వచనం సుత్వా, సకం చిత్తం పసాదయిం;

పుప్ఫేహి థూపం కత్వాన, తత్థ కాలఙ్కతో అహం.

౨౧. ‘‘తే మే సరీరం ఝాపేత్వా, అగముం బుద్ధసన్తికం;

అఞ్జలిం పగ్గహేత్వాన, సత్థారమభివాదయుం.

౨౨. ‘‘పుప్ఫేహి థూపం కత్వాన, సుగతస్స మహేసినో;

కప్పానం సతసహస్సం, దుగ్గతిం నుపపజ్జహం.

౨౩. ‘‘చత్తాలీససహస్సమ్హి, కప్పే సోళస ఖత్తియా;

నామేనగ్గిసమా నామ, చక్కవత్తీ మహబ్బలా.

౨౪. ‘‘వీసకప్పసహస్సమ్హి, రాజానో చక్కవత్తినో;

ఘతాసనసనామావ, అట్ఠత్తింస మహీపతీ.

౨౫. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా పుప్ఫథూపియో థేరో ఇమా గాథాయో అభాసిత్థాతి.

పుప్ఫథూపియత్థేరస్సాపదానం దుతియం.