౩. పాయసదాయకత్థేరఅపదానం

౨౬. ‘‘సువణ్ణవణ్ణో సమ్బుద్ధో, బాత్తింసవరలక్ఖణో;

పవనా [పధానో (క.)] అభినిక్ఖన్తో, భిక్ఖుసఙ్ఘపురక్ఖతో [సువణ్ణవణ్ణం …పే… పురక్ఖతం-ఏవం దుతియన్తవసేన సీ. స్యా. పోత్థకేసు దిస్సతి].

౨౭. ‘‘మహచ్చా [సహత్థా (స్యా. క.)] కంసపాతియా, వడ్ఢేత్వా పాయసం [పాయాసం (స్యా. క.)] అహం;

ఆహుతిం యిట్ఠుకామో సో, ఉపనేసిం బలిం అహం.

౨౮. ‘‘భగవా తమ్హి సమయే, లోకజేట్ఠో నరాసభో;

చఙ్కమం సుసమారూళ్హో, అమ్బరే అనిలాయనే.

౨౯. ‘‘తఞ్చ అచ్ఛరియం దిస్వా, అబ్భుతం లోమహంసనం;

ఠపయిత్వా కంసపాతిం, విపస్సిం అభివాదయిం.

౩౦. ‘‘తువం దేవోసి [బుద్ధోసి (స్యా.)] సబ్బఞ్ఞూ, సదేవే సహమానుసే;

అనుకమ్పం ఉపాదాయ, పటిగణ్హ మహాముని.

౩౧. ‘‘పటిగ్గహేసి భగవా, సబ్బఞ్ఞూ లోకనాయకో;

మమ సఙ్కప్పమఞ్ఞాయ, సత్థా లోకే మహాముని [అనుత్తరో (స్యా.)].

౩౨. ‘‘ఏకనవుతితో కప్పే, యం దానమదదిం తదా;

దుగ్గతిం నాభిజానామి, పాయసస్స [పాయాసస్స (స్యా. క.)] ఇదం ఫలం.

౩౩. ‘‘ఏకతాలీసితో కప్పే, బుద్ధో నామాసి ఖత్తియో;

సత్తరతనసమ్పన్నో, చక్కవత్తీ మహబ్బలో.

౩౪. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా పాయసదాయకో [పాయాసదాయకో (స్యా. క.)] థేరో ఇమా గాథాయో అభాసిత్థాతి.

పాయసదాయకత్థేరస్సాపదానం తతియం.