౮. అనురుద్ధసంయుత్తం

౧. రహోగతవగ్గో

౧-౨. పఠమరహోగతసుత్తాదివణ్ణనా

౮౯౯-౯౦౦. అనురుద్ధసంయుత్తస్స పఠమే ఆరద్ధాతి పరిపుణ్ణా. సఙ్ఖేపతో పనేత్థ ఛత్తింసాయ ఠానేసు అరహత్తం పాపేత్వా విపస్సనా కథితా, దుతియే ద్వాదససు ఠానేసు అరహత్తం పాపేత్వా విపస్సనా కథితా.

౩. సుతనుసుత్తవణ్ణనా

౯౦౧. తతియే మహాభిఞ్ఞతన్తి ఛఅభిఞ్ఞాభావం. హీనం ధమ్మన్తిఆదీసు ఇమాయ పాళియా అత్థో వేదితబ్బో –

‘‘కతమే ధమ్మా హీనా? ద్వాదస అకుసలచిత్తుప్పాదా, ఇమే ధమ్మా హీనా. కతమే ధమ్మా మజ్ఝిమా? తీసు భూమీసు కుసలం, తీసు భూమీసు విపాకో, తీసు భూమీసు కిరియాబ్యాకతం సబ్బఞ్చ రూపం, ఇమే ధమ్మా మజ్ఝిమా. కతమే ధమ్మా పణీతా? చత్తారో మగ్గా అపరియాపన్నా, చత్తారి చ సామఞ్ఞఫలాని నిబ్బానఞ్చ, ఇమే ధమ్మా పణీతా’’తి (ధ. స. ౧౪౨౩-౧౪౨౫).

౪-౭. పఠమకణ్డకీసుత్తాదివణ్ణనా

౯౦౨-౯౦౫. చతుత్థే కణ్డకీవనేతి మహాకరమన్దవనే. ఛట్ఠే సహస్సం లోకన్తి ఇమినా థేరస్స సతత విహారో దస్సితో. థేరో హి పాతోవ ముఖం ధోవిత్వా అతీతానాగతే కప్పసహస్సం అనుస్సరతి. పచ్చుప్పన్నే పన దసచక్కవాళసహస్సం ఏకావజ్జనస్స ఆపాథమాగచ్ఛతి. సత్తమం ఉత్తానమేవ.

౮. సలళాగారసుత్తవణ్ణనా

౯౦౬. అట్ఠమే సలళాగారేతి సలళరుక్ఖమయాయ పణ్ణసాలాయ, సలళరుక్ఖస్స వా ద్వారే ఠితత్తా ఏవంనామకే అగారే. ఇమస్మిం సుత్తే విపస్సనాయ సద్ధిం విపస్సకపుగ్గలో కథితో.

౯. అమ్బపాలివనసుత్తవణ్ణనా

౯౦౭. నవమే ఆసభిం వాచన్తి అత్తనో అరహత్తభావదీపకం ఉత్తమవాచం. సేసం సబ్బత్థ ఉత్తానత్థమేవాతి.

రహోగతవగ్గో పఠమో.

౨. దుతియవగ్గవణ్ణనా

౯౦౯-౯౨౨. దుతియవగ్గే ఠానఞ్చ ఠానతోతిఆదీహి థేరో దసబలఞాణం పటిజానాతి. కిమ్పనేతం సావకానం హోతీతి? ఏకదేసేన హోతి, సబ్బఞ్ఞుబుద్ధానం పనేతం నిప్పదేసం సబ్బాకారపరిపూరన్తి.

అనురుద్ధసంయుత్తవణ్ణనా నిట్ఠితా.