౬. సప్పఞ్ఞవగ్గో

౨. వస్సంవుత్తసుత్తవణ్ణనా

౧౦౪౮. ఛట్ఠస్స దుతియే అయమధిప్పాయో – సోతాపన్నో భిక్ఖు ఏత్తకేన వోసానం అనాపజ్జిత్వా తానేవ ఇన్ద్రియబలబోజ్ఝఙ్గాని సమోధానేత్వా విపస్సనం వడ్ఢేత్వా సకదాగామిమగ్గం పాపుణిస్సతి, సకదాగామీ అనాగామిమగ్గం, అనాగామీ అరహత్తమగ్గన్తి ఇమమత్థం సన్ధాయ భగవతా ఇమస్మిం సుత్తే సాసనే తన్తి పవేణీ కథితాతి.

౩. ధమ్మదిన్నసుత్తవణ్ణనా

౧౦౪౯. తతియే ధమ్మదిన్నోతి సత్తసు జనేసు ఏకో. బుద్ధకాలస్మిఞ్హి ధమ్మదిన్నో ఉపాసకో, విసాఖో ఉపాసకో, ఉగ్గో గహపతి, చిత్తో గహపతి, హత్థకో ఆళవకో, చూళఅనాథపిణ్డికో, మహాఅనాథపిణ్డికోతి ఇమే సత్త జనా పఞ్చసతఉపాసకపరివారా అహేసుం. ఏతేసు ఏస అఞ్ఞతరో.

గమ్భీరాతి ధమ్మగమ్భీరా సల్లసుత్తాదయో. గమ్భీరత్థాతి అత్థగమ్భీరా చేతనాసుత్తన్తాదయో. లోకుత్తరాతి లోకుత్తరత్థదీపకా అసఙ్ఖతసంయుత్తాదయో. సుఞ్ఞతప్పటిసంయుత్తాతి సత్తసుఞ్ఞతాదీపకా ఖజ్జనికసుత్తన్తాదయో. ఉపసమ్పజ్జ విహరిస్సామాతి పటిలభిత్వా విహరిస్సామ. ఏవఞ్హి వో, ధమ్మదిన్న, సిక్ఖితబ్బన్తి ఏవం తుమ్హేహి చన్దోపమపటిపదం రథవినీతపటిపదం మోనేయ్యపటిపదం మహాఅరియవంసపటిపదం పూరేన్తేహి సిక్ఖితబ్బం. ఇతి సత్థా ఇమేసం ఉపాసకానం అసయ్హభారం ఆరోపేసి. కస్మా? ఏతే కిర న అత్తనో భూమియం ఠత్వా ఓవాదం యాచింసు, అవిసేసేన పన సబ్బభారం ఉక్ఖిపితుం సమత్థా వియ ‘‘ఓవదతు నో, భన్తే, భగవా’’తి యాచింసు. తేన తేసం సత్థా అసయ్హభారం ఆరోపేన్తో ఏవమాహ. న ఖో నేతన్తి న ఖో ఏతం. నకారో పనేత్థ బ్యఞ్జనసన్ధిమత్తమేవాతి వేదితబ్బో. తస్మాతి యస్మా ఇదాని అత్తనో భూమియం ఠత్వా ఓవాదం యాచథ, తస్మా.

౪. గిలానసుత్తవణ్ణనా

౧౦౫౦. చతుత్థే న ఖో పనేతన్తి న ఖో అమ్హేహి ఏతం. సప్పఞ్ఞో ఉపాసకోతి సోతాపన్నో అధిప్పేతో. అస్సాసనీయేహి ధమ్మేహీతి అస్సాసకరేహి ధమ్మేహి. అస్సాసతాయస్మాతి అస్సాసతు ఆయస్మా. మారిసోతి మరణపటిబద్ధో. మరణధమ్మోతి మరణసభావో. అధిమోచేహీతి ఠపేహి. అధిమోచితన్తి ఠపితం. ఏవం విముత్తచిత్తస్సాతి ఏవం అరహత్తఫలవిముత్తియా విముత్తచిత్తస్స. యదిదం విముత్తియా విముత్తన్తి యం ఇదం విముత్తిం ఆరబ్భ విముత్తియా నానాకరణం వత్తబ్బం సియా, న తం వదామి. భిక్ఖుసఙ్ఘస్స హి చేతియఙ్గణబోధియఙ్గణవత్తేసు చేవ అసీతిక్ఖన్ధకవత్తేసు చాతి ఆగమనీయగుణేసు పమాణం నామ నత్థి, పటివిద్ధే పన మగ్గే వా ఫలే వా ఉపాసకానఞ్చ భిక్ఖూనఞ్చ నానాకరణం నత్థి.

౯. పఞ్ఞాపటిలాభసుత్తవణ్ణనా

౧౦౫౫. నవమే పఞ్ఞాపటిలాభాయ సంవత్తన్తీతి ఏత్థ సత్త సేక్ఖా పఞ్ఞం పటిలభన్తి నామ, ఖీణాసవో పటిలద్ధపఞ్ఞో నామాతి వేదితబ్బో. పరతో పఞ్ఞాబుద్ధియాతిఆదీసుపి ఏసేవ నయో. సేసం సబ్బత్థ ఉత్తానమేవాతి.

సప్పఞ్ఞవగ్గో ఛట్ఠో.