౯. సుపణ్ణసంయుత్తవణ్ణనా

౩౯౨-౪౩౭. సుపణ్ణసంయుత్తే పత్తానం వణ్ణవన్తతాయ గరుళా సుపణ్ణాతి వుత్తా. ఇధాపి పఠమసుత్తం పురిమనయేనేవ అట్ఠుప్పత్తియం వుత్తం. హరన్తీతి ఉద్ధరన్తి. ఉద్ధరమానా చ పన తే అత్తనా హీనే వా సమే వా ఉద్ధరితుం సక్కోన్తి, న అత్తనా పణీతతరే. సత్తవిధా హి అనుద్ధరణీయనాగా నామ పణీతతరా కమ్బలస్సతరా ధతరట్ఠా సత్తసీదన్తరవాసినో పథవిట్ఠకా పబ్బతట్ఠకా విమానట్ఠకాతి. తత్ర అణ్డజాదీనం జలాబుజాదయో పణీతతరా, తే తేహి అనుద్ధరణీయా. కమ్బలస్సతరా పన నాగసేనాపతినో, తే యత్థ కత్థచి దిస్వా యో కోచి సుపణ్ణో ఉద్ధరితుం న సక్కోతి. ధతరట్ఠా పన నాగరాజానో, తేపి కోచి ఉద్ధరితుం న సక్కోతి. యే పన సత్తసీదన్తరే మహాసముద్దే వసన్తి, తే యస్మా కత్థచి వికమ్పనం కాతుం న సక్కా, తస్మా కోచి ఉద్ధరితుం న సక్కోతి. పథవిట్ఠకాదీనం నిలీయనోకాసో అత్థి, తస్మా తేపి ఉద్ధరితుం న సక్కోతి. యే పన మహాసముద్దే ఊమిపిట్ఠే వసన్తి, తే యో కోచి సమో వా పణీతతరో వా సుపణ్ణో ఉద్ధరితుం సక్కోతి. సేసం నాగసంయుత్తే వుత్తనయమేవాతి.

సుపణ్ణసంయుత్తవణ్ణనా నిట్ఠితా.