౧౦. గన్ధబ్బకాయసంయుత్తవణ్ణనా

౪౩౮-౫౪౯. గన్ధబ్బకాయసంయుత్తే మూలగన్ధే అధివత్థాతి యస్స రుక్ఖస్స మూలే గన్ధో అత్థి, తం నిస్సాయ నిబ్బత్తా. సో హి సకలోపి రుక్ఖో తేసం ఉపకప్పతి. సేసపదేసుపి ఏసేవ నయో. గన్ధగన్ధేతి మూలాదిగన్ధానం గన్ధే. యస్స హి రుక్ఖస్స సబ్బేసమ్పి మూలాదీనం గన్ధో అత్థి, సో ఇధ గన్ధో నామ. తస్స గన్ధస్స గన్ధే, తస్మిం అధివత్థా. ఇధ మూలాదీని సబ్బాని తేసంయేవ ఉపకప్పన్తి. సో దాతా హోతి మూలగన్ధానన్తి సో కాళానుసారికాదీనం మూలగన్ధానం దాతా హోతి. ఏవం సబ్బపదేసు అత్థో వేదితబ్బో. ఏవఞ్హి సరిక్ఖదానమ్పి దత్వా పత్థనం ఠపేన్తి, అసరిక్ఖదానమ్పి. తం దస్సేతుం సో అన్నం దేతీతిఆది దసవిధం దానవత్థు వుత్తం. సేసం సబ్బత్థ ఉత్తానమేవాతి.

గన్ధబ్బకాయసంయుత్తవణ్ణనా నిట్ఠితా.