౧౧. వలాహకసంయుత్తవణ్ణనా

౫౫౦-౬౦౬. వలాహకసంయుత్తే వలాహకకాయికాతి వలాహకనామకే దేవకాయే ఉప్పన్నా ఆకాసచారికదేవా. సీతవలాహకాతి సీతకరణవలాహకా. సేసపదేసుపి ఏసేవ నయో. చేతోపణిధిమన్వాయాతి చిత్తట్ఠపనం ఆగమ్మ. సీతం హోతీతి యం వస్సానే వా హేమన్తే వా సీతం హోతి, తం ఉతుసముట్ఠానమేవ. యం పన సీతేపి అతిసీతం, గిమ్హే చ ఉప్పన్నం సీతం, తం దేవతానుభావేన నిబ్బత్తం సీతం నామ. ఉణ్హం హోతీతి యం గిమ్హానే ఉణ్హం, తం ఉతుసముట్ఠానికం పాకతికమేవ. యం పన ఉణ్హేపి అతిఉణ్హం, సీతకాలే చ ఉప్పన్నం ఉణ్హం, తం దేవతానుభావేన నిబ్బత్తం ఉణ్హం నామ. అబ్భం హోతీతి అబ్భమణ్డపో హోతి. ఇధాపి యం వస్సానే చ సిసిరే చ అబ్భం ఉప్పజ్జతి, తం ఉతుసముట్ఠానికం పాకతికమేవ. యం పన అబ్భేయేవ అతిఅబ్భం, సత్తసత్తాహమ్పి చన్దసూరియే ఛాదేత్వా ఏకన్ధకారం కరోతి, యఞ్చ చిత్తవేసాఖమాసేసు అబ్భం, తం దేవతానుభావేన ఉప్పన్నం అబ్భం నామ. వాతో హోతీతి యో తస్మిం తస్మిం ఉతుమ్హి ఉత్తరదక్ఖిణాదిపకతివాతో హోతి, అయం ఉతుసముట్ఠానోవ. యోపి పన రుక్ఖక్ఖన్ధాదిపదాలనో అతివాతో నామ అత్థి, అయఞ్చేవ, యో చ అఞ్ఞోపి అకాలవాతో, అయం దేవతానుభావనిబ్బత్తో నామ. దేవో వస్సతీతి యం వస్సికే చత్తారో మాసే వస్సం, తం ఉతుసముట్ఠానమేవ. యం పన వస్సేయేవ అతివస్సం, యఞ్చ చిత్తవేసాఖమాసేసు వస్సం, తం దేవతానుభావనిబ్బత్తం నామ.

తత్రిదం వత్థు – ఏకో కిర వస్సవలాహకదేవపుత్తో తలకూటకవాసి ఖీణాసవత్థేరస్స సన్తికం గన్త్వా వన్దిత్వా అట్ఠాసి. థేరో ‘‘కోసి త్వ’’న్తి పుచ్ఛి. ‘‘అహం, భన్తే, వస్సవలాహకదేవపుత్తో’’తి. ‘‘తుమ్హాకం కిర చిత్తేన దేవో వస్సతీ’’తి? ‘‘ఆమ, భన్తే’’తి. ‘‘పస్సితుకామా మయ’’న్తి. ‘‘తేమిస్సథ, భన్తే’’తి. ‘‘మేఘసీసం వా గజ్జితం వా న పఞ్ఞాయతి, కథం తేమిస్సామా’’తి? ‘‘భన్తే, అమ్హాకంచిత్తేన దేవో వస్సతి, తుమ్హే పణ్ణసాలం పవిసథా’’తి. ‘‘సాధు దేవపుత్తా’’తి సో పాదే ధోవిత్వా పణ్ణసాలం పావిసి. దేవపుత్తో తస్మిం పవిసన్తేయేవ ఏకం గీతం గాయిత్వా హత్థం ఉక్ఖిపి. సమన్తా తియోజనట్ఠానం ఏకమేఘం అహోసి. థేరో అద్ధతిన్తో పణ్ణసాలం పవిట్ఠోతి. అపిచ దేవో నామేస అట్ఠహి కారణేహి వస్సతి నాగానుభావేన సుపణ్ణానుభావేన దేవతానుభావేన సచ్చకిరియాయ ఉతుసముట్ఠానేన మారావట్టనేన ఇద్ధిబలేన వినాసమేఘేనాతి.

వలాహకసంయుత్తవణ్ణనా నిట్ఠితా.