౮. నాగసంయుత్తం

౧. సుద్ధికసుత్తవణ్ణనా

౩౪౨. నాగసంయుత్తే అణ్డజాతి అణ్డే జాతా. జలాబుజాతి వత్థికోసే జాతా. సంసేదజాతి సంసేదే జాతా. ఓపపాతికాతి ఉపపతిత్వా వియ జాతా. ఇదఞ్చ పన సుత్తం అట్ఠుప్పత్తియా వుత్తం. భిక్ఖూనఞ్హి ‘‘కతి ను ఖో నాగయోనియో’’తి కథా ఉదపాది. అథ భగవా పుగ్గలానం నాగయోనీహి ఉద్ధరణత్థం నాగయోనియో ఆవికరోన్తో ఇమం సుత్తమాహ.

౨-౫౦. పణీతతరసుత్తాదివణ్ణనా

౩౪౩-౩౯౧. దుతియాదీసు వోస్సట్ఠకాయాతి అహితుణ్డికపరిబుద్ధం అగణేత్వా విస్సట్ఠకాయా. ద్వయకారినోతి దువిధకారినో, కుసలాకుసలకారినోతి అత్థో. సచజ్జ మయన్తి సచే అజ్జ మయం. సహబ్యతం ఉపపజ్జతీతి సహభావం ఆపజ్జతి. తత్రస్స అకుసలం ఉపపత్తియా పచ్చయో హోతి, కుసలం ఉపపన్నానం సమ్పత్తియా. అన్నన్తి ఖాదనీయభోజనీయం. పానన్తి యంకిఞ్చి పానకం. వత్థన్తి నివాసనపారుపనం. యానన్తి ఛత్తుపాహనం ఆదిం కత్వా యంకిఞ్చి గమనపచ్చయం. మాలన్తి యంకిఞ్చి సుమనమాలాదిపుప్ఫం. గన్ధన్తి యంకిఞ్చి చన్దనాదిగన్ధం. విలేపనన్తి యంకిఞ్చి ఛవిరాగకరణం. సేయ్యావసథపదీపేయ్యన్తి మఞ్చపీఠాదిసేయ్యం ఏకభూమికాదిఆవసథం వట్టితేలాదిపదీపూపకరణఞ్చ దేతీతి అత్థో. తేసఞ్హి దీఘాయుకతాయ చ వణ్ణవన్తతాయ చ సుఖబహులతాయ చ పత్థనం కత్వా ఇమం దసవిధం దానవత్థుం దత్వా తం సమ్పత్తిం అనుభవితుం తత్థ నిబ్బత్తన్తి. సేసం సబ్బత్థ ఉత్తానమేవాతి.

నాగసంయుత్తవణ్ణనా నిట్ఠితా.