౭. సారిపుత్తసంయుత్తం

౧-౯. వివేకజసుత్తాదివణ్ణనా

౩౩౨-౩౪౦. సారిపుత్తసంయుత్తస్స పఠమే న ఏవం హోతీతి అహఙ్కారమమఙ్కారానం పహీనత్తా ఏవం న హోతి. దుతియాదీసుపి ఏసేవ నయో. పఠమాదీని.

౧౦. సుచిముఖీసుత్తవణ్ణనా

౩౪౧. దసమే సుచిముఖీతి ఏవంనామికా. ఉపసఙ్కమీతి థేరం అభిరూపం దస్సనీయం సువణ్ణవణ్ణం సమన్తపాసాదికం దిస్వా ‘‘ఇమినా సద్ధిం పరిహాసం కరిస్సామీ’’తి ఉపసఙ్కమి. అథ థేరేన తస్మిం వచనే పటిక్ఖిత్తే ‘‘ఇదానిస్స వాదం ఆరోపేస్సామీ’’తి మఞ్ఞమానా తేన హి, సమణ, ఉబ్భముఖో భుఞ్జసీతి ఆహ. దిసాముఖోతి చతుద్దిసాముఖో, చతస్సో దిసా ఓలోకేన్తోతి అత్థో. విదిసాముఖోతి చతస్సో విదిసా ఓలోకేన్తో.

వత్థువిజ్జాతిరచ్ఛానవిజ్జాయాతి వత్థువిజ్జాసఙ్ఖాతాయ తిరచ్ఛానవిజ్జాయ. వత్థువిజ్జా నామ లాబువత్థు-కుమ్భణ్డవత్థు-మూలకవత్థు-ఆదీనం వత్థూనం ఫలసమ్పత్తికారణకాలజాననుపాయో. మిచ్ఛాజీవేన జీవికం కప్పేన్తీతి తేనేవ వత్థువిజ్జాతిరచ్ఛానవిజ్జాసఙ్ఖాతేన మిచ్ఛాజీవేన జీవికం కప్పేన్తి, తేసం వత్థూనం సమ్పాదనేన పసన్నేహి మనుస్సేహి దిన్నే పచ్చయే పరిభుఞ్జన్తా జీవన్తీతి అత్థో. అధోముఖాతి వత్థుం ఓలోకేత్వా భుఞ్జమానవసేన అధోముఖా భుఞ్జన్తి నామ. ఏవం సబ్బత్థ యోజనా కాతబ్బా. అపి చేత్థ నక్ఖత్తవిజ్జాతి ‘‘అజ్జ ఇమం నక్ఖత్తం ఇమినా నక్ఖత్తేన గన్తబ్బం, ఇమినా ఇదఞ్చిదఞ్చ కాతబ్బ’’న్తి ఏవం జాననవిజ్జా. దూతేయ్యన్తి దూతకమ్మం, తేసం తేసం సాసనం గహేత్వా తత్థ తత్థ గమనం. పహిణగమనన్తి ఏకగామస్మింయేవ ఏకకులస్స సాసనేన అఞ్ఞకులం ఉపసఙ్కమనం. అఙ్గవిజ్జాతి ఇత్థిలక్ఖణపురిసలక్ఖణవసేన అఙ్గసమ్పత్తిం ఞత్వా ‘‘తాయ అఙ్గసమ్పత్తియా ఇదం నామ లబ్భతీ’’తి ఏవం జాననవిజ్జా. విదిసాముఖాతి అఙ్గవిజ్జా హి తం తం సరీరకోట్ఠాసం ఆరబ్భ పవత్తత్తా విదిసాయ పవత్తా నామ, తస్మా తాయ విజ్జాయ జీవికం కప్పేత్వా భుఞ్జన్తా విదిసాముఖా భుఞ్జన్తి నామ. ఏవమారోచేసీతి ‘‘ధమ్మికం సమణా’’తిఆదీని వదమానా సాసనస్స నియ్యానికం గుణం కథేసి. తఞ్చ పరిబ్బాజికాయ కథం సుత్వా పఞ్చమత్తాని కులసతాని సాసనే ఓతరింసూతి.

సారిపుత్తసంయుత్తవణ్ణనా నిట్ఠితా.