౬. కిలేససంయుత్తవణ్ణనా

౩౨౨-౩౩౧. కిలేససంయుత్తే చిత్తస్సేసో ఉపక్కిలేసోతి కతరచిత్తస్స? చతుభూమకచిత్తస్స. తేభూమకచిత్తస్స తావ హోతు, లోకుత్తరస్స కథం ఉపక్కిలేసో హోతీతి? ఉప్పత్తినివారణతో. సో హి తస్స ఉప్పజ్జితుం అప్పదానేన ఉపక్కిలేసోతి వేదితబ్బో. నేక్ఖమ్మనిన్నన్తి నవలోకుత్తరధమ్మనిన్నం. చిత్తన్తి సమథవిపస్సనాచిత్తం. అభిఞ్ఞా సచ్ఛికరణీయేసు ధమ్మేసూతి పచ్చవేక్ఖణఞాణేన అభిజానిత్వా సచ్ఛికాతబ్బేసు ఛళభిఞ్ఞాధమ్మేసు, ఏకం ధమ్మం వా గణ్హన్తేన నేక్ఖమ్మన్తి గహేతబ్బం. సేసం సబ్బత్థ ఉత్తానమేవాతి.

కిలేససంయుత్తవణ్ణనా నిట్ఠితా.