౨-౪. ఏతంమమసుత్తాదివణ్ణనా

౨౦౭-౨౦౯. దిట్ఠన్తిఆదీసు దిట్ఠం రూపాయతనం. సుతం సద్దాయతనం. ముతం గన్ధాయతనం రసాయతనం ఫోట్ఠబ్బాయతనం. తఞ్హి పత్వా గహేతబ్బతో ముతన్తి చ వుత్తం. అవసేసాని సత్తాయతనాని విఞ్ఞాతం నామ. పత్తన్తి పరియేసిత్వా వా అపరియేసిత్వా వా పత్తం. పరియేసితన్తి పత్తం వా అపత్తం వా పరియేసితం. అనువిచరితం మనసాతి చిత్తేన అనుసఞ్చరితం. లోకస్మిఞ్హి పరియేసిత్వా పత్తమ్పి అత్థి, పరియేసిత్వా నోపత్తమ్పి, అపరియేసిత్వా పత్తమ్పి, అపరియేసిత్వా నోపత్తమ్పి. తత్థ పరియేసిత్వా పత్తం పత్తం నామ, పరియేసిత్వా నోపత్తం పరియేసితం నామ. అపరియేసిత్వా పత్తఞ్చ అపరియేసిత్వా నోపత్తఞ్చ మనసానువిచరితం నామ. అథ వా పరియేసిత్వా పత్తమ్పి అపరియేసిత్వా పత్తమ్పి పత్తట్ఠేన పత్తం నామ, పరియేసిత్వా నోపత్తమేవ పరియేసితం నామ, అపరియేసిత్వా నోపత్తం మనసానువిచరితం నామ. సబ్బం వా ఏతం మనసా అనువిచరితమేవ.